ریاض: سعودی وزیر حج وعمرہ ڈاکٹر توفیق الربیہ نے پیش گوئی کی ہے کہ مملکت مضبوط معیشت کے ساتھ کورونا بحران سے مکمل طور پر نکل آئے گا۔
عرب میڈیا کی رپورٹ کے مطابق ایک اجلاس میں اظہار خیال کرتے ہوئے ڈاکٹر توفیق نے کہا کہ سعودی عرب کی معاشی بہتری اس بات کی عکاسی ہے کہ ہم وبائی صورت حال سے نکل رہے ہیں۔
وزیر حج وعمرہ کا کہنا تھا کہ مقامی شہریوں سمیت عمرہ زائرین کی صحت کی حفاظت بھی یقینی بنائی جارہی ہے، وبا کے باعث سعودی شہر مکہ اور مدینہ نے بھاری نقصان اٹھایا۔
انہوں نے کہا کہ غیرملکیوں کے لیے عمرے پر پابندی اور زائرین کی تعداد محدود کرنے سے دونوں شہروں کی معاشی صورت حال کا توازن بگڑا۔
ڈاکٹر توفیق کا کہنا تھا کہ موجودہ صورت حال میں معیشت کو سہارا دینے کے لیے نجی اور سرکاری شعبوں کو مل کر کام کرنے کی ضرورت ہے۔ وزیر نے حج وعمرہ کی استعداد بڑھانے پر بھی زور دیا۔
سعودی وزیر حج عمرہ نے مزید کہا کہ مملکت میں خصوصی ٹیم تشکیل دی جائے گی جو مکہ چیمبر آف کامرس کے ساتھ ملک کر وزٹرز کی سہولتوں کے لیے کام کریں گے۔