The news is by your side.

Advertisement

مناسکِ حج کا آغاز آج سے ہو رہا ہے

ریاض: مناسک حج کا آغاز آج سے ہو رہا ہے ، دنیا بھر سے آئے تیس لاکھ سے زائد فرزندان اسلام مناسک حج ادا کریں گے، منیٰ میں خیموں کا شہر آباد ہوگیا۔

 مکہ میں موجود تقریباً 30 لاکھ عازمین آج منیٰ میں قیام کریں گے، یہاں سے عازمین میدان عرفات کے لئے روانہ ہوجائیں گے اوربدھ کو میدان عرفات میں وقوف ادا کریں گے۔ وقوف عرفہ جو حج کا رکن اعظم ہے۔

عازمین میدان عرفات میں ظہر اور عصر کی نماز ایک ساتھ ادا کریں گے اس کے ساتھ ہی خطبۂ حج شروع ہوجائے گا جو سورج غروب ہونے تک جاری رہے گا۔ میدان عرفات میں حاجی بارگاہ رب العزت میں عجزوانکساری کے ساتھ دعا مانگیں گے۔

غروب آفتاب کے ساتھ ہی حاجی مزدلفہ کے لئے روانہ ہوجائیں گے۔ رات کھلے آسمان تلے قیام کے بعد جمعرات کو رمی جمرات کریں گے۔ شیطان کو کنکریاں مارنے کے بعد حجاج کرام سنت ابراہیمی کی پیروی کرتے ہوئے جانوروں کی قربانی دیں گے۔ اس کے بعد سرمنڈوا کر طواف زیارت کریں گے۔

حرم شریف کی طرف آنے والی تمام شاہراؤں اور مقدس مقامات تک عازمین کو لے جانے کیلئے تمام انتظامات مکمل کرلیے گئے ہیں، حج کے موقع پر سیکیورٹی کے غیرمعمولی انتظامات کئے گئے ہیں۔ کرین حادثے سے حج متاثر نہیں ہوگا۔

سعودی ولی عہد شہزادہ محمد بن نائف نے کہا ہے کہ عازمین کا تحفظ اولین ترجیح ہے۔ انہوں نے کہا دوران حج کسی شرپسند کو مناسک حج کی ادائیگی میں کسی قسم کی رکاوٹ ڈالنے کی اجازت نہیں دی جائے گی۔

Print Friendly, PDF & Email

Comments

comments

یہ بھی پڑھیں