The news is by your side.

Advertisement

مزید بارشوں سے کراچی سمیت پورے سندھ میں بڑی تباہی آسکتی ہے، حلیم عادل شیخ

کراچی : تحریک انصاف سندھ کے صدر حلیم عادل شیخ نے کہا ہے کہ پچھلے دنوں ہونے والی بارشوں کو دس دن گزرنے کے باوجود نکاسی آب کا انتظام نہیں ہوسکا، مزید بارشوں کا امکان ہے جس سے کراچی سمیت پورے سندھ میں بڑی تباہی آسکتی ہے۔

یہ بات انہوں نے اپنے حلقہ پی ایس99کے مختلف علاقوں کے دورے کے موقع پر میڈیا سے گفتگو کرتے ہوئے کہی، حلیم عادل شیخ نے کہا کہ بارشوں کو گزرے دس دن ہوگئے ہیں مگر کراچی کے مختلف علاقوں میں جمع ہوا پانی اب تک نہیں نکالا گیا۔

میرے حلقے احسن آباد،گل گوٹھ، و دیگر علاقوں میں ابھی تک پانی کھڑا ہوا ہے، پی ایس علاقے کی مختلف مساجد اور مدارس میں گندا پانی ابھی تک کھڑا ہے، مؤثر حکمت عملی نہ بنائی گئی تو مزید بارشوں سے تباہی ہوگی۔

میڈیا سے گفتگو کرتے ہوئے حلیم عادل شیخ نے مزید کہا کہ انہوں نے کے ایم سی اور واٹر بورڈ کی مشینری کے ہمراہ پورا دن جمع پانی کو نکلوانے کی کوشش کی ہے۔

جمعے سے مزید بارشوں کا امکان ہے اور پانی کا کھڑا ہونا بہت تشویش ناک ہے جس سے کراچی سمیت پورے سندھ میں بڑی تباہی آسکتی ہے۔

انہوں نے کہا کہ سندھ حکومت کو موثر اقدامات اٹھانے کی ضرورت ہے، مزید بارشوں سے نمٹے کیلئے شہری حکومت کو ابھی سے حکمت عملی بنانا ہوگی۔

حکمت عملی نہ بنائی گئی تو یہ علاقے دوبارہ زیر آب آجائیں گے اور جانی نقصان ہونے کا خدشہ ہے۔ انہوں نے کہا کہ سندھ حکومت میں محکموں کی تبدیلی سے کوئی فرق نہیں پڑے گا بلکہ عوامی خدمت کا جذبہ دکھانے کی ضرورت ہے۔

Comments

comments

یہ بھی پڑھیں