کراچی: تحریک انصاف کے رہنما اور اپوزیشن لیڈر سندھ حلیم عادل شیخ نے جیل بھجوانے پر مراد علی شاہ کا طنزیہ انداز سے شکریہ ادا کیا ہے۔
نمائندہ اے آر وائی نیوز کے مطابق جناح اسپتال میں زیر علاج حلیم عادل شیخ نے سندھ حکومت کے ترجمان مرتضیٰ وہاب اور سعید غنی کے بیانات پر ردِ عمل دیا۔
اُن کا کہنا تھا کہ ’میں مراد علی شاہ کا مشکور ہوں جس نے مجھے جیل بھیج کر سیاست کی ڈگری اور سرٹیفیکٹ بھی دلوایا‘۔ حلیم عادل شیخ کا کہنا تھا کہ ’میری دہشت گردی یہ ہے کہ میں سندھ کے عوام کی بات کرتا ہوں، اگر جیل میں مجھ پر حملہ نہیں کیا گیا تو مرتضیٰ وہاب جیل کی پوری سی سی ٹی وی فوٹیج جاری کردیں کیونکہ فوٹیج کی ترمیم کر کے اسے جاری کیا گیا‘۔
اپوزیشن لیڈر سندھ نے صوبائی وزیر تعلیم کو مخاطب کرتے ہوئے کہا کہ ’ سعید غنی صاحب آپ کی پارٹی کی پچیس سال پہلے اسپتالوں کی بڑی پرنور کہانیاں ہیں، سعید غنی وزیرتعلیم نہیں بلکہ زیر تعلیم ہیں‘۔
مزید پڑھیں: حلیم عادل شیخ پر تشدد ہوا یا نہیں؟ ویڈیو سامنے آگئی
یہ بھی پڑھیں: حلیم عادل شیخ کا معاملہ، وفاقی حکومت کا آئی جی سندھ کی تبدیلی پر غور شروع
حلیم عادل شیخ کا کہنا تھا کہ ’ آرتھوپیڈ (ہڈی کے ڈاکٹر) نے معائنہ کرنے کے بعد میرے ہاتھ میں کریب پٹی باندھی جو این آئی سی وی ڈی والے نہیں باندھ سکتے‘۔ اپوزیشن لیڈر سندھ نے وزیراعلیٰ کو مخاطب کرتے ہوئے کہا کہ ’مراد علی شاہ صاحب آپ اُتنا ظلم کریں جتنا برداشت کرسکتے ہیں‘۔
اپوزیشن لیڈر کا کہنا تھا کہ ’جیل کی ذمہ داری ہوم سیکریٹری سندھ کی تھی، آپ نے صرف ایک کمبل بھیج کر اپنے آقاؤں کو تسکین پہنچائی‘۔ حلیم عادل شیخ نے سرکاری افسران کو متنبہ کرتے ہوئے کہا کہ ’پولیس افسران اور بیورو کریٹ سندھ حکومت کی غلامی کرنا چھوڑ دیں‘۔
