لاہور : نیب لاہور نے کروڑوں روپے کے فراڈ میں ملوث ہالی موٹرز اسکینڈل کے مرکزی ملزم شفیق ہالی کو گرفتار کرلیا، ملزم کے خلاف شہریوں کو گاڑیاں دلوانے کے نام پرایڈوانس رقم جمع کروانے کے عوض خطیر رقم لوٹنے کا الزام ہے۔
تفصیلات کے مطابق تین کروڑ پچاس لاکھ روپے سے محروم ہونے والے ایک سو پچاس سے زائد شہریوں نے ملزم کیخلاف ماہ جولائی دوہزار سولہ میں نیب لاہور سے رجوع کیا تھا جبکہ دیگر متاثرین نے بھی ملزم کے خلاف درخواستیں نیب لاہور کے دفتر میں جمع کروائی ہیں۔
ڈی جی نیب کی جانب سے انکوائری کی منظوری کے بعد نیب لاہور نے تحقیقیات کا آغاز کیا، شفیق ہالی کا ایک شریک ملزم کیشیئر محمد اعظم اکتوبر دوہزار سولہ سے گرفتار ہے جبکہ نیب کی جانب سے ملزم کے پارٹنر نعیم عرفان کو بھی گرفتارکیا جاچکا ہے۔
ہالی موٹرز کے مرکزی ملزم شفیق ہالی نے جو لائی 2015 میں مین بلیورڈ, فیصل ٹاؤن لاہور میں واقع اپنے دفتر میں لوگوں کو 2 سے 3 لاکھ ایڈوانس رقم پرگاڑی دینے کا لالچ دینا شروع کیا۔
ملزم نے پبلسٹی کے ذریعے شہریوں کو دو سے تین لاکھ ایڈوانس جمع کروانے اور پندرہ سے بیس دن میں صرف بارہ ہزار روپے ماہانہ کی اقساط پر گاڑی دینے کا جھانسہ دیا اور شہریوں کو کروڑوں روپے کا چونا لگا کرغائب ہوگیا۔
شفیق ہالی جون دوہزار سولہ سے فرارتھا، جسے آج نیب لاہور نے کامیاب کارروائی کرتے ہوئے گرفتارکرلیا، ملزم کو کل احتساب عدالت میں جسمانی ریمانڈ کے حصول کیلئے پیش کیا جائے گا۔
