The news is by your side.

حکومت اگلے ماہ سے ٹیکس نادہندگان کے خلاف کارروائی شروع کرے گی، حماد اظہر

اسلام آباد: وزیر مملکت برائے ریونیو حماد اظہر کا کہنا ہے کہ ٹیکس چوروں کو قانونی کارروائی کا سامنا کرنا ہوگا۔

تفصیلات کے مطابق وفاقی وزیر محصولات حماد اظہر نے کہا کہ حکومت اگلے ماہ سے ٹیکس نادہندگان کے خلاف کارروائی شروع کرے گی۔

انہوں نے کہا کہ ملک میں چالیس سے پچاس لاکھ ٹیکس نادہندگان کے بارے میں معلومات موصول ہوئی ہیں، ٹیکس چوروں کو قانونی کارروائی کا سامنا کرنا ہوگا۔

حماد اظہر نے کہا کہ فیڈرل بورڈ آف ریونیو ملک بھر میں ٹیکس گوشوارے جمع نہ کرانے والے افراد کی جانچ پڑتال کا عمل شروع کرے گا۔

وزیر مملکت برائے ریونیو نے کہا کہ جعلی اکاؤنٹس رکھنے والوں کے خلاف ایک اور آپریشن شروع کیا جائے گا تاکہ بے نامی اکاؤنٹس کے رجحان کی حوصلہ شکنی کی جاسکے۔

اس سے قبل گزشتہ ہفتے حماد اظہر کا کہنا تھا کہ تاجر برادری کو ٹیکس کی ادائیگی میں سہولت فراہم کرنے اور ان کی ٹیکس سے متعلقہ مشکلات کو کم کرنے کے لیے حکومت آئندہ بجٹ میں ان پر فکسڈ ٹیکس عائد کرنے پرغور کررہی ہے۔

ٹیکس معاملات میں کسی کو رعایت نہیں دی جائے گی، حماد اظہر

یاد رہے کہ 2 فروری کو وزیر مملکت برائے ریونیو حماد اظہر کا کہنا تھا کہ 5 سال کا میڈیم ٹرم معاشی پلان لے کر آرہے ہیں، جیسے جیسے معاشی صورت حال بہتر ہوگی ٹیکس بھی کم ہوں گے۔

Comments

یہ بھی پڑھیں