لاہور: پاکستان تحریک انصاف کے راہنما حماد اظہر نے وزیر خزانہ اسحاق ڈار کی پریس کانفرنس پر سخت ردعمل کا اظہار کیا ہے۔
زمان پارک میں میڈیا سے گفتگو میں حماد اظہر نے کہا کہ ابھی اسحاق ڈار نے پریس کانفرنس کی، تعجب کی بات ہے کہ معیشت تباہ ہو رہی ہے اور کوئی روڈ میپ نہیں دیتا۔
حما اظہر نے کہا کہ اسحاق ڈار نے غیر ذمہ دارانہ باتیں کیں، کاروبار ڈوب رہے ہیں، گاڑیاں بنانے والے کارخانے بند ہو رہے ہیں، ٹیکسٹائل سمیت دیگر صنعتیں ڈوب رہی ہیں، مہنگائی کی شرح بڑھ چکی ہے اور حکومت کے پاس کوئی روڈ میپ نہیں ہے۔
راہنما پی ٹی آئی نے کہا: ’ملک کو اس وقت نئے انتخابات کی ضرورت ہے۔ ملک کو 5 سال کے لیے مضبوط حکومت کے حوالے نہ کیا گیا تو ملک دیوالیہ ہو جائے گا۔ ہمارے دور میں تو ٹاک شوز ہوتے تھے لیکن اب سب خاموش ہیں۔‘
انہوں نے کہا کہ عمران خان جو اربوں کما سکتے تھے انہیں گھڑی کی ضرورت نہیں تھی، ہمیں ملک کے حالات پر بات کرنی چاہیے، میڈیا پر معاشی تباہی کے حوالے سے بات ہونی چاہیے، اس وقت صرف ایک ہی راستہ ہے عام انتخابات کرائے جائیں۔
