The news is by your side.

حمزہ علی عباسی کا بالی وڈ کی 2 بڑی فلمیں ٹھکرانے کا انکشاف

مشہور پاکستانی اداکار حمزہ علی عباسی نے انکشاف کیا ہے کہ انہوں نے ماضی میں بالی وڈ کی دو بڑی فلموں میں کام کی آفرز ٹھکرا دیں۔

حمزہ علی عباسی نے اداکار گوہر رشید کے ہمراہ نجی نیوز چینل سے گفتگو میں بتایا کہ میں نے بالی وڈ کی دو بڑی فلموں میں کام کرنے سے انکار کیا۔

اس دوران گوہر رشید نے بتایا کہ حمزہ نے 2017 میں ریلیز ہونے والی فلم ’جڑواں 2‘ میں اداکار ورن دھون کے ساتھ کام کرنے کی آفر ٹھکرائی۔

حمزہ علی عباسی نے بتایا: ’آفر ٹھکرانے کی وجہ پاکستان اور بھارت کے مابین کشیدہ حالات تھے۔ دوسرا یہ کہ اسکرپٹ میں کچھ ایسا مواد تھا جسے میں نے قبول نہیں کیا اور پیچھے ہٹ گیا۔‘

اداکار نے بتایا کہ فلم ’جڑواں 2‘ کے لیے ہدایت کار ساجد نادیوالا خود میرے پاس آئے اور اسکرپٹ پڑھ کر سنایا لیکن مجھے فلم میں کردار کا کچھ اندازہ نہیں تھا۔

اپنی گفتگو میں حمزہ علی عباسی نے یہ بھی بتایا کہ اس سے قبل میں نے اکشے کمار کی فلم ’بے بی‘ میں کام سے انکار کیا کیوں کہ اس میں پاکستان مخالف مواد شامل تھا۔

Comments

یہ بھی پڑھیں