The news is by your side.

Advertisement

اپوزیشن کا عدم اعتماد کا خواب شرمندہ تعبیر نہیں ہوگا، حسان خاور

لاہور : معاون خصوصی وزیراعلیٰ پنجاب حسان خاور نے کہا ہے کہ اپوزیشن کی پریشانی اور پشیمانی میں روز بروز اضافہ ہورہا ہے، اپوزیشن کا عدم اعتماد کا خواب، خواب ہی رہ جائے گا۔

انہوں نے کہا کہ مائیکرو سافٹ کے بانی بل گیٹس کی پاکستان آمد باعث افتخار ہے، بل گیٹس نے پہلی بار پاکستان کا دورہ کیا، بل گیٹس کی پولیو کے خاتمے کی کاوشیں سنہری حروف میں لکھے جانے کے قابل ہیں۔

حسان خاور نے کہا کہ بل گیٹس کی آمد وزیر اعظم عمران خان کی کامیاب خارجہ پالیسی کا مظہر ہے، بل گیٹس کی آمد سے پاکستان کا مثبت اور روشن چہرہ دنیا بھر میں اجاگر ہوا۔

ترجمان وزیراعلیٰ پنجاب کا کہنا تھا کہ بل گیٹس کا دورہ پولیو کے خاتمے اور معاشی چیلنجز سے نمٹنے کیلئے معاون ثابت ہوگا، بل گیٹس نے احساس پروگرام اور کورونا سے نمٹنے کیلئے حکومتی اقدامات کی بھرپور تعریف کی۔

غربت کے خاتمے اور کورونا سے نمٹنے کیلئے حکومت کے اقدامات دنیا کیلئے قابل تقلید ہیں، پاکستان دنیا میں قائدانہ کردار ادا کررہا ہے، دنیا کی نظریں پاکستان پر جمی ہوئی ہیں۔

انہوں نے کہا کہ پاکستان پہلی مرتبہ دنیا بھر میں ممتاز مقام حاصل کررہا ہے، دنیا بھر کی اہم شخصیات پاکستان کا دورہ کررہی ہیں، پاکستان امن کا علمبردار اور معاشی طاقت بن رہا ہے۔

معاون خصوصی نے بتایا کہ اقوام عالم وزیراعظم عمران خان کی قائدانہ صلاحیتوں سے مستفید ہو رہے ہیں، وطن عزیز کا سنہری، روشن اور تابناک مستقبل روز روشن کی طرح عیاں ہورہا ہے۔

انہوں نے کہا کہ سیاسی بونوں کا چائے کی پیالی میں برپا کیا جانے والاطوفان آخری دموں پر ہے، اپوزیشن کے بلندو بانگ دعوے زمین بوس ہو رہے ہیں، اپوزیشن کی پریشانی اور پشیمانی میں روز بروز اضافہ ہورہا ہے۔

حسان خاور کا مزید کہنا تھا کہ اپوزیشن کا عدم اعتماد ایک خواب ہے اور خواب ہی رہ جائے گا جو کبھی شرمندہ تعبیر نہیں ہوگا، اپوزیشن کو ذاتی مفاد اور لوٹ مار کیلئے ملکی ترقی و خوشحالی میں روڑے نہیں اٹکانے دیں گے۔

Comments

یہ بھی پڑھیں