کراچی : ایف آئی اے بینک سرکل کے عملے نے شہر کے مختلف علاقوں میں کارروائیاں کرکے حوالہ ہنڈی کے غیر قانونی کاروبار میں ملوث 4 ملزمان کو حراست میں لے لیا۔
تفصیلات کے مطابق ڈپٹی ڈائریکٹر کمرشل بینکنگ سرکل کراچی رابعہ قریشی کی ہدایت پر ٹیم نے مختلف کارروائیوں میں 4 ملزمان کو گرفتار کیا گیا۔
ایف آئی اے حکام کا کہنا ہے کہ گرفتار ملزمان میں سے ملزم عزیز مرچنٹ کو تین تلوار جبکہ ملزم محمد ہمایوں، سلیم الدین اور عثمان عارف کو گولڈ سینٹر صدر سے گرفتار کیا گیا۔
ملزمان کے قبضے سے لاکھوں روپے مالیت کی ملکی و غیر ملکی کرنسی کی حوالہ ہنڈی سے متعلق رسیدیں بھی تحویل میں لے لی گئیں۔ ملزمان بغیر لائسنس کے غیرملکی کرنسی کی خرید و فروخت میں ملوث ہیں۔
ذرائع کے مطابق ملزمان کے قبضے سے 16320 امریکی ڈالر, 364920 روپے اور ہنڈی حوالہ سے متعلق رسیدیں بر آمد کر لی گئی۔
گرفتار ملزم کے موبائل فونز سے درجنوں ہنڈی حوالہ اور غیر قانونی کرنسی ایکسچینج سے متعلق پیغامات بھی برآمد کر لئے گئے. ترجمان ایف آئی اے کے مطابق ملزمان کے خلاف مقدمہ درج کر لیا گیا۔مزید تفتیش جاری ہے۔
