The news is by your side.

Advertisement

اسحٰق ڈار کے خلاف ریفرنس کی سماعت 30مارچ تک ملتوی

اسلام آباد: سابق وزیر خزانہ اسحٰق ڈار کے خلاف ریفرنس میں شریک ملزمان پر آج بھی فرد جرم عائد نہ ہوسکی۔ سماعت 30 مارچ تک ملتوی کردی گئی۔

تفصیلات کے مطابق احتساب عدالت میں سابق وزیر خزانہ اسحٰق ڈار کے خلاف ریفرنس سے متعلق سماعت ہوئی۔ احتساب عدالت کے جج محمد بشیر نے کیس کی سماعت کی۔

کیس میں نامزد شریک ملزمان پر آج بھی فرد جرم عائد نہ ہوسکی۔ نیشنل بینک کے صدر سعید احمد خان کا حاضری سے 2 روز کا استثنیٰ منظور کرلیا گیا۔

ملزمان کو آئندہ سماعت پر 10، 10 لاکھ روپے کے ضمانتی مچلکے جمع کروانے کا حکم بھی دیا گیا۔ کیس کی مزید سماعت 30 مارچ تک ملتوی کردی گئی۔

خیال رہے کہ اس سے قبل سماعت میں عدالت نے اسحٰق ڈار کی درخواست ناقابل سماعت قرار دے کر خارج کردی تھی۔ اسلام آباد ہائیکورٹ نے احتساب عدالت کا حکم برقرار رکھا تھا۔

اس سے قبل 20 مارچ کو سابق وزیر خزانہ اسحٰق ڈار کے خلاف اثاثہ جات ریفرنس میں ملزم سعید احمد کی ضمنی ریفرنس خارج کرنے کی درخواست عدالت نے مسترد کردی تھی۔

یاد رہے کہ گزشتہ ماہ 26 فروری کو نیب نے اسحٰق ڈار کے خلاف آمدن سے زائد اثاثے بنانے کا ضمنی ریفرنس دائر کیا تھا جس میں نیشنل بینک کے سابق صدر سعید احمد خان سمیت 3 ملزمان کو نامزد کیا گیا تھا۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

Comments

comments

یہ بھی پڑھیں