لاہور: حمزہ شہبازکا نام ای سی ایل میں شامل کرنے کے خلاف کیس کی سماعت کے دوران عدالت نے وفاقی حکومت، ایف آئی اے کوتفصیلی جواب داخل کرنے کی ہدایت کردی۔
تفصیلات کے مطابق لاہور ہائی کورٹ میں حمزہ شہباز کا نام ای سی ایل میں شامل کرنے کے خلاف کیس کی سماعت ہوئی۔
ڈپٹی اٹارنی جنرل نے سماعت کے دوران ایف آئی اے کی جانب سے جواب جمع کرایا، انہوں نے کہا کہ عدالت کی بجائے وزارت داخلہ سے رجوع کیا جائے۔
وکیل حمزہ شہباز نے دلائل دیتے ہوئے کہا کہ وفاقی سیکرٹری داخلہ سے پہلے ہی رجوع کر رکھا ہے، وفاقی کابینہ نے نام ای سی ایل میں شامل کرنے کی منظوری دی۔
انہوں نے کہا کہ عدالتی حکم کے مطابق حمزہ شہبازبیرون ملک سے واپس آچکے ہیں۔
بعدازاں لاہور ہائی کورٹ نے وفاقی حکومت، ایف آئی اے کوتفصیلی جواب داخل کرنےکی ہدایت کرتے ہوئے کیس کی سماعت 22 مارچ تک ملتوی کردی۔
یاد رہے کہ اس وقت شریف خاندان کے مختلف افراد کو بدعنوانی کے الزامات کے تحت مقدمات کا سامنا ہے، جن میں شہباز شریف کے صاحب زادہ حمزہ شہباز بھی شامل ہیں.
واضح رہے کہ 11 جنوری 2019 کو قومی احتساب بیورو (نیب) نے چنیوٹ میں رمضان شوگر ملز کیس کا ریفرنس مکمل کرکے شہباز شریف اور حمزہ شہباز کو ملزم نامزد کیا تھا، چیئرمین نیب کی منظوری کے بعد ریفرنس عدالت میں دائر کیا جائے گا۔
