کراچی : شہر قائد میں ہیٹ ویو کا خطرہ ٹل گیا، درجہ حرارت میں بہتری اور سمندری ہوائیں چلیں گی، تاہم اتوار کو پارہ 38 سے 40 ڈگری تک جانے کا امکان ہے۔
تفصیلات کے مطابق ڈائریکٹر محکمہ موسمیات سردار سرفراز نے کہا شہر میں سمندری ہوائیں معطل ہونے کا خدشہ بھی ٹل گیا ہے، دن کے اوقات میں سمندری ہوائیں چلتی رہیں گی۔
سردار سرفراز کا کہنا تھا کہ شہرکے اوپرہائی پریشرایریا موجود نہیں جس سے اب شہرمیں گرمی کی لہر درمیانے درجے کی ہوسکتی ہے۔
شہر قائد میں ہیٹ ویو کی شدت میں کمی آگئی ہے تاہم اتوار پارہ 38سے 40ڈگری تک جانے کا امکان ہے جبکہ اور 27 مئی تک درجہ حرارت 37 سے 39 ڈگری تک جا سکتا ہے۔
مزید پڑھیں : کراچی والے تیار ہوجائیں، ایک بارپھر ہیٹ ویو الرٹ جاری
محکمہ موسمیات کے مطابق کراچی میں مغربی علاقوں سے ہوائیں28 کلومیٹر فی گھنٹہ کی رفتار سے چل رہی ہیں اور ہوا میں نمی کا تناسب 48 فیصد ہے۔
یاد رہے محکمہ موسمیات نے کراچی میں 3روز ہیٹ ویو کی پیش گوئی کی تھی،جس کے تحت 25 سے 27 مئی تک شدید گرمی پڑنا تھی، ہفتے سے پیرکے درمیان درجہ حرارت 40سے 42ڈگری سینٹی گریڈ رہنے کا امکان ظاہرکیا گیا تھا۔
دوسری جانب طبی ماہرین نے کہا ہے شدید گرمی کے اثرات سے بچنے کیلئے شہری دن کے اوقات خصوصی طورپرصبح 11سے سہ پہر3 بجے کے درمیان باہرنہ نکلیں، اپنا سرگیلے کپڑے سے ڈھانپیں ،روزے دار حضرات سحر و افطار میں پانی کا زیادہ سے زیادہ استعمال کریں۔
