راولپنڈی : اسلام آباد اورراولپنڈی اور گردونواح کے علاقوں میں گرج چمک کے ساتھ موسلادھار بارش سے موسم سرد ہوگیا، جڑواں شہروں میں موسلا دھار بارش کے دوران واسا نے الرٹ جاری کردیا ہے۔
تفصیلات کے مطابق اسلام آباد اورراولپنڈی اور گردونواح کے علاقوں میں وقفے وقفے سے موسلا دھار بارش کا سلسلہ جاری ہے ، اب تک شمس آ باد کے مقام پر سب سے زیادہ 115 ملی میٹر بارش ریکارڈ کی جا چکی ہے جبکہ چکلالہ 67، پی ایم ڈی 65، بوکڑہ 29 اور سیدپور کے مقام پر 24 ملی میٹر بارش ریکارڈ کی گئی ہے۔
جڑواں شہروں میں موسلا دھاربارش کے دوران واسا نے الرٹ جاری کردیا ، جس کے بعد واسا کا عملہ ہیوی مشینری کے ساتھ نشیبی علاقوں میں پہنچ گیا۔
منیجنگ ڈائریکٹر واسا راجہ شوکت محمود کا کہنا ہے کہ موسلادھاربارش سےپیدا ہونے والی صورتحال پرگہری نظر رکھے ہوئے ہیں، نشیبی علاقوں میں واسا عملہ ہیوی مشینری کے ساتھ موجود ہے، نالہ لئی کی مسلسل مانیٹرنگ کی جارہی ہے اب تک کٹاریاں کے مقام پر 9فٹ جبکہ گوالمنڈی پل پانی کی سطح 8فٹ تک ہے۔
ایم ڈی واسا نے کہا کہ کسی بھی قسم کی ہنگامی صورتحال سے نمٹنے کیلئے تیار ہیں، ائیر پورٹ روڈ، کمیٹی چوک نڈر پاس، لیا قت باغ، جاوید کالونی، ڈھوک کھبہ، صادق آباد، سیٹلائٹ ٹاؤن , جامع مسجد روڈ اور مری روڈ پر ٹیمیں موجود ہیں۔
دوسری جانب بارش کے باعث بجلی فراہم کرنے والے متعدد فیڈرز ٹرپنگ اور فالٹ کی باعث بند ہے ، ترجمان آئیسکو نے بتایا ہے آپریشن ٹیمیں الرٹ ہیں ،موسم بہترہوتے ہی بحالی کاکام شروع کردیا گیا ہے۔
آئیسکوچیف نے لائن اسٹاف کوکام کےدوران احتیاطی تدابیراختیار کرنے کی ہدایت دی گئی ہے۔
