کراچی: ملک کے معروف ماہر امراض خون ڈاکٹر طاہر شمسی انتقال کرگئے۔
اے آر وائی نیوز کے مطابق ملک کے نامور ہیموٹولوجسٹ ( ماہر امراض خون) ڈاکٹر طاہر شمسی نے کراچی کے نجی اسپتال میں دم توڑا، وہ وہ کچھ روز قبل برین ہمیبرج کا شکار ہوئے تھے۔
ڈاکٹرز کی جانب سے ہنگامی بنیادوں پر ان کا آپریشن بھی کیا گیا، آپریشن کے بعد طبیعت بگڑنے پر انہیں وینٹی لیٹر پر منتقل کیا گیا، جہاں وہ آج چل بسے۔
ڈاکٹر طاہر شمسی کا شمار ملک میں بون میروٹرانسپلانٹ کےبانیوں میں ہوتا تھا، مرحوم کی نماز جنازہ بعد نماز ظہر نجم مسجد شہید ملت روڈپر ادا کی جائے گی۔
یہ بھی پڑھیں: نامور ہیموٹولوجسٹ ڈاکٹر طاہر شمسی برین ہیمرج کا شکار
یہاں یہ بات بھی قابل ذکر ہے کہ ڈاکٹر طاہر شمسی نے کرونا وبا کی پہلی لہر کے دوران حکومت سے اپیل کی تھی کہ کرونا کا علاج پلازمہ تھراپی سے کیا جائے، حکومت نے ان کی اس تجویز کو قابل قبول قرار دیا تھا اور سینکڑوں مریضوں کو پلازمہ تھراپی کے باعث کرونا سے نجات ملی تھی۔
وزیراعلیٰ پنجاب عثمان بزدار نے ڈاکٹرطاہر شمسی کےانتقال پراظہار افسوس کیا ہے، اپنے تعزیتی بیان میں عثمان بزدار نے کہا کہ ڈاکٹرطاہر شمسی کی وفات سےدلی صدمہ ہوا ہے،طبی شعبہ کے لئےان کی خدمات کوہمیشہ یاد رکھاجائےگا۔
وزیرصحت سندھ نے ڈاکٹر طاہر شمسی کے انتقال پر گہرے دکھ کا اظہار کرتے ہوئے اسے طب اور تحقیق دونوں شعبوں کا نقصان قرار دیا ہے۔
ڈاکٹر عذرا پیچوہو نے کہا کہ ڈاکٹرطاہر شمسی نےطب کے شعبےمیں نمایاں خدمات انجام دیں، طب کےشعبے میں ڈاکٹر طاہرشمسی کی خدمات کویاد رکھا جائےگا۔
