The news is by your side.

Advertisement

ایف آئی اے اہل کار سے کروڑوں روپے مالیت کی ہیروئن برآمد

کراچی: شہرِ قائد کے ایئر پورٹ پر ہیروئن اسمگلنگ کا ایک انوکھا واقعہ پیش آیا، اے ایس ایف نے ایف آئی اے اہل کار کے زیر جامے سے بھاری مقدار میں ہیروئن بر آمد کر لی۔

تفصیلات کے مطابق کراچی ایئر پورٹ پر اے ایس ایف نے ایف آئی اے اہل کار کو گرفتار کر کے اس کے زیر جامے میں چھپائی گئی بھاری مقدار میں ہیروئن بر آمد کر لی، ملزم کی نشان دہی پر ساتھی اہل کار کو بھی گرفتار کر لیا گیا۔

ذرایع کے مطابق ایف آئی اے اہل کار ضامن ایئر پورٹ کے انٹرنیشنل ڈیپارچر لاؤنج میں اندر داخل ہو رہا تھا جس پر اے ایس ایف اہل کار نے تلاشی لی۔

اس دوران ایف آئی اے اہل کار کی حرکات و سکنات مشکوک ہونے پر اے ایس ایف کی جانب سے جامہ تلاشی لینے پر زیر جامے سے 772 گرام ہیروئن کے تین پیکٹ بر آمد ہوئے، جس کی بین الاقوامی مالیت کروڑوں روپے بتائی جاتی ہے۔

اے ایس ایف نے ایف آئی اے اہل کار سے تفتیش کی تو اس کی گاڑی سے ڈیڑھ لاکھ روپے رقم بھی برآمد ہوئی۔

دوران تفتیش ایف آئی اے اہل کار نے بتایا کہ اس کے ساتھی اہل کار حسنین عباس زیدی نے اس سے منشیات منگوائی تھی، اے ایس ایف نے نشان دہی پر ساتھی اہل کار کو بھی حراست میں لے لیا۔

ذرایع کے مطابق اے ایس ایف نے دونوں گرفتار ایف آئی اے اہل کاروں سے مزید تفتیش کے لیے انھیں اینٹی نارکوٹکس فورس کے حوالے کر دیا ہے۔

Comments

comments

یہ بھی پڑھیں