The news is by your side.

Advertisement

نیپرا نے حیسکو پر 3 کروڑ 10 لاکھ روپے کا جرمانہ عائد کر دیا

اسلام آباد: نیپرا نے حیسکو (حیدر آباد الیکٹرک سپلائی کمپنی) پر 3 کروڑ 10 لاکھ روپے کا جرمانہ عائد کر دیا۔

تفصیلات کے مطابق جولائی 2019 سے اکتوبر 2020 تک کرنٹ لگنے سے شہریوں کی اموات کے معاملے پر نیپرا نے حیسکو پر 3 کروڑ 10 لاکھ روپے کا جرمانہ عائد کر دیا ہے۔

نیشنل الیکٹرک پاور ریگولیٹری اتھارٹی (نیپرا) کے مطابق مذکورہ مدت کے دوران کرنٹ لگنے سے شہر میں 15 افراد کی اموات ہوئی تھیں۔

اتھارٹی نے اس سلسلے میں تحقیقات کے لیے 3 ممبران پر مشتمل ایک کمیٹی تشکیل دی تھی، تحقیقاتی کمیٹی کی رپورٹ میں 15 میں سے 12 اموات میں حیسکو قصوروار پایا گیا۔

نیپرا کا کہنا ہے کہ ان 12 اموات میں 5 خود حیسکو ہی کے ملازمین تھے، جب کہ 7 عام لوگ تھے، اتھارٹی نے نیپرا ایکٹ کے تحت حیسکو کو شوکاز نوٹس جاری کیا تھا اور سماعت کا موقع بھی دیا۔

رپورٹ کے مطابق حیسکو حفاظتی معیار برقرار رکھنے کے لیے اپنی ذمہ داریاں پوری کرنے میں ناکام رہا، حیسکو نے نیپرا کے معیارات کے مطابق اتھارٹی کو اموات کی اطلاع بھی نہیں دی۔

نیپرا نے حیسکو کو دیگر سوگوار خاندانوں کو ادارے کے ملازمین کے برابر 35 لاکھ فی کس معاوضہ دینے کی ہدایت جاری کی ہے، حیسکو معاوضے کی تفصیلات بھی اتھارٹی کے ساتھ شیئر کرے گی۔

Comments

یہ بھی پڑھیں