کراچی: حال ہی میں اداکار آریز احمد کے ساتھ رشتہ ازدواج میں منسلک ہونے والی معروف اداکارہ حبا بخاری نے لڑکیوں کو سسرال میں رہنے سے متعلق مفید مشورے دے دیے۔
اے آر وائی ڈیجیٹل کے ڈرامہ سیریل ’بے رخی‘ میں سبین کا مرکزی کردار نبھانے والی اداکارہ حبا بخاری نے ایک انٹرویو میں بتایا کہ وہ سسرال میں کس طرح رہ رہی ہیں۔
میزبان نے حبا سے شادی کے بعد زندگی میں ہونے والی تبدیلیوں، سسرال اور شوہر آریز احمد سے متعلق سوالات پوچھے۔
حبا بخاری نے بتایا کہ جب شادی ہوئی تو سسرال میں سب نے میرا خیال رکھا، میری چیزوں کو کسی نے ہاتھ نہیں لگایا اور فریج میں کچھ کھانے کے لیے رکھا ہے تو وہ ویسے ہی رکھا ہوتا تھا۔
انہوں نے کہا کہ شادی کے بعد ہم گھومنے چلے گئے تھے اور جب واپس آئے تو دیکھا کہ کھانے پینے کی چیزیں ویسے ہی رکھی ہیں۔
اداکارہ نے بتایا کہ میں نے بولنا شروع کیا کہ آپ لوگ آکر پاس بیٹھا کریں، کمرے میں آجایا کریں اس کے بعد میں نے کمرے کا دروازہ بند کرنا بھی چھوڑ دیا۔
حبا بخاری کا کہنا تھا کہ آپ کی پرائیویسی اہم ہوتی ہے لیکن اب ایسا بھی نہیں کہ آپ سسرال جائیں اور کہیں کہ اب یہ علاقہ تو میرا ہے، ایسا نہیں ہونا چاہیے، پورا گھر اور وہاں کے لوگ آپ کے ہی ہیں۔
انہوں نے کہا کہ ان کے اس طرح کا رویہ اختیارکرنے پر سسرال والوں نے بہت عزت دی۔
واضح رہے کہ حبا بخاری اے آر وائی ڈیجیٹل کے ڈرامہ سیریل ’بے رخی‘ میں سبین کا مرکزی کردار نبھا رہی ہیں، ڈرامے میں ان کے ہمراہ جنید خان، نازش جہانگیر، عفت عمر ودیگر شامل ہیں، ڈرامے کی آخری قسط 23 مارچ کو رات 8 بجے نشر کی جائے گی۔
