اسلام آباد : تحریک انصاف کے مرکزی رہنما فواد چوہدری کی اہلیہ حبا چوہدری نے کہا ہے کہ پولیس سرچ وارنٹ کے بہانے گھر سے کوئی بھی غیرقانونی چیز کی برآمدگی ظاہر کردے گی۔
پولیس کی جانب سے سرچ وارنٹ کے حوالے سے حبا فواد کا کہنا تھا کہ سرچ وارنٹ کے بار بار اصرار پر خدشہ ہے کہ کوئی چیز ڈال کر کہیں گے کہ گھر سے برآمد ہوئی۔
یہ بات انہوں نے فواد چوہدری کی عدالت میں پیشی کے موقع پر میڈیا سے گفتگو کرتے ہوئے کہی انہوں نے کہا کہ فواد چوہدری کو دہشت گردوں کی طرح عدالت لایا جاتا ہے، پولیس بار بارفواد چوہدری کے منہ پر کپڑا ڈال کرلاتی ہے، اس عمل کو روکا جائے۔
حبا فواد کا کہنا تھا کہ میری بچیاں گھر میں موجود ہیں اور کہا جارہا ہے سرچ وارنٹ دیا جائے، خدشہ ہے کہ کوئی چیز ڈال کرکہیں گے کہ یہ گھر سے برآمد ہوئی، جس طرح اعظم سواتی، شہبازگل کےساتھ ہوا وہی فواد کے ساتھ بھی ہورہا ہے۔
انہوں نے میڈیا کو بتایا کہ صبح 8بجے سے عدالت میں موجود ہیں ابھی تک فواد سے ملنے کی اجازت نہیں دی گئی ہے، چیئرمین پی ٹی آئی کی کال آئی تھی وہ ایک ایک چیز کو مانیٹر کررہے ہیں۔
