لندن : برطانیہ میں 20 کروڑ روہے سالانہ کمانے والے بھارتی بینکر کو سینڈوچ چوری کرنے پر ملازمت سے برخاست کردیا گیا۔
غیر ملکی خبر رساں ادارے کی رپورٹ کے مطابق برطانوی دارالحکومت لندن میں بطور بینکر ملازمت کرنے والا پارس شاہ نامی بھارتی شہری کینٹین سے سینڈوچ چوری کرنے کے الزام میں نوکری سے ہاتھ دھو بیٹھا۔
غیر میڈیا کا کہنا تھا کہ پارس شاہ کی سالانہ تنخواہ 10 لاکھ پاؤنڈ تھی جو پاکستانی روپیوں میں کم از کم 20 کروڑ روپے سالانہ بنتی ہے۔
میڈیا ذرائع کے مطابق امریکی بینک اپنے ملازمین کے لیے بہت جلد بونس کا اعلان کرنے والا تھا جس کے بعد پارس شاہ کو بھاری رقم بطور بونس دی جاتی تاہم انہیں اس سے قبل ہی ملازمت سے فارغ کردیا گیا۔
31 سالہ بینکر کے ساتھیوں کا میڈیا سے گفتگو کرتے ہوئے کہنا تھا کہ پارس ایک کامیاب اور باصلاحیت ٹریڈر تھا جس کا کام سب کو پسند آتا تھا۔
میڈیا رپورٹس میں بتایا گیا ہے کہ 31 سالہ بھارتی شہری گزشتہ تین برس سے لندن میں واقع امریکی بینکنگ گروپ کے ہیڈکوارٹر میں اہم عہدے پر تعینات تھے۔
