پشاور: خیبرپختونخوا سے تحریک انصاف کو ایک اور دھچکا لگ گیا اور سابق صوبائی وزیر ڈاکٹر ہشام انعام اللہ نے پارٹی چھوڑنے کا فیصلہ کرلیا۔
خیبرپختونخوا کے سابق صوبائی وزیر ڈاکٹر ہشام انعام اللہ نے پریس کانفرنس میں کہا کہ 9 مئی کے واقعے پر بہت رنجیدہ ہوں، سوچ بھی نہیں سکتا تھا کہ احتجاج کی آڑ میں لوگ اس حد تک چلے جائیں گے۔
انہوں نے کا کہ عمران خان اور پارٹی کے مخصوص افراد ریاستی اداروں کیخلاف ہوگئے، ہمارے شہدا کی تصاویر کو جلایاگیا اور ان کے مجسمے گرائےگئے، فوجی تنصیات پر حملہ کیاگیا جس کی اجازت نہیں دی جاسکتی، پی ٹی آئی کے شرپسندوں نے حملہ کیا میرے لیے یہ سب شرمناک ہے‘۔
’ اس لیے تحریک انصاف کے ساتھ مزید منسلک رہنا اپنی توہین تصور کرتاہوں، میں بطور تحریک انصاف رکن استعفیٰ دیتا ہوں، میرے خون میں بے وفائی نہیں، کوئی دلیل یا جواز ہو تو فیصلے بدلتے رہتے ہیں، اختلاف رائے جمہوریت کا حسن ہے، میں نے ہمیشہ پارٹی اصلاح اور بہتری کیلئے کوششیں کی ہے‘۔
ہشام انعام اللہ نے کہا کہ پی ٹی آئی سے منسلک رہنا وطن سے بے وفائی سمجھتا ہوں، جنہوں نے ملک کیساتھ دشمنی کی ان کیساتھ نہیں رہ سکتا، مجھ پر پارٹی چھوڑنے کیلئےکوئی دباؤ نہیں، میرا فیصلہ میرے ضمیر کا فیصلہ ہے، یہ ملک اور فوج میری ہے ان پر سمجھوتا نہیں کرسکتا۔
سابق وزیر نے مزید کہا کہ ہمارے جوان روز وطن اور ہمارے لیے جانیں قربان کررہے ہیں، میرا فیصلہ ایسا نہیں ہوتا اگر عمران خان واقعات کی مذمت کر دیتے، عمران خان کو رہائی کے بعد شہدا کی یادگاروں کا دورہ کرنا چاہیے تھا۔
انہوں نے کہا کہ عمران خان کو کہنا چاہیےتھا ملک اور اداروں کو جو نقصان پہنچائےگاہم ان کیساتھ نہیں ہونگے، عمران خان مثبت بیان دیتے تو ادارے اور ہم سب خوش ہوتے۔
