ابو ظہبی: متحدہ عرب امارات میں گھروں پر قرنطینہ کرنے والے کووڈ 19 کے مصدقہ یا مشتبہ مریضوں کے لیے نئی ہدایات جاری کردی گئیں۔
اماراتی ویب سائٹ کے مطابق ابو ظہبی ایمرجنسی، کرائسز اینڈ ڈیزاسٹر کمیٹی نے محکمہ صحت ابو ظہبی اور ابو ظہبی پبلک ہیلتھ سینٹر کے اشتراک سے کووڈ 19 کے مثبت کیسز سے رابطے میں رہنے والے افراد کے لیے ہدایات کو اپ ڈیٹ کیا ہے۔
اتوار 15 اگست 2021 سے نافذ العمل ہدایات کے تحت ایسے افراد جنہوں نے ویکسین لگوائی ہے، 7 روز تک قرنطینہ میں رہیں گے اور چھٹے روز پی سی آر ٹیسٹ کروائیں گے۔
پی سی آر ٹیسٹ منفی آنے کی صورت میں وہ کلائی کے بینڈ کو اتار کر ساتویں روز قرنطینہ ختم کریں گے۔
ایسے افراد جنہوں نے ویکسین نہیں لگوائی وہ 10 دن قرنطینہ میں رہیں گے اور نویں روز پی سی آر ٹیسٹ کروائیں گے۔ پی سی آر ٹیسٹ منفی آنے کی صورت میں وہ کلائی کے بینڈ کو اتار کر دسویں روز قرنطینہ ختم کریں گے۔
ہوم قرنطینہ پروگرام میں رجسٹرڈ افراد مفت واک ان پی سی آر ٹیسٹ کروا سکتے ہیں اور زاید پورٹ (ابوظہبی سٹی)، العین کنونشن سینٹر اور الظفرۃ میں مدینہ زاید کے ایس ای ایچ اے پرائم اسسمنٹ سینٹرز سمیت الظفرہ میں ایس ای ایچ اے کے تمام اسپتالوں سے کلائی کا بینڈ نکلوا سکتے ہیں۔
