سڈنی: آسٹریلوی خاتون کے اُس وقت ہاتھ پاؤں پھول گئے جب انہوں نے خریدی گئی اشیا کے پیکٹ میں سانپ کو رینگتے ہوئے دیکھا، خوف ناک واقعے نے سوشل میڈیا صارفین کو بھی ورطہ حیرت میں ڈال کردیا۔
غیرملکی خبررساں ادارے کی رپورٹ کے مطابق یہ انوکھا واقعہ آسٹریلیا کے دارالحکومت سڈنی میں پیش آیا جہاں لیسلی نامی خاتون کے بیٹے نے بند گوبھی کا پیکٹ خرید کر گھر لایا لیکن حیران کن طور پر اس میں زیریلے سانپ کا بچہ بھی موجود تھا جو سبزی کے گرد رینگتا ہوا دیکھا گیا۔
رپورٹ کے مطابق بیٹے نے یہ سبزی مقامی سپرمارکیٹ سے خریدی تھی لیکن اسے یہ نہیں پتا تھا کہ اس میں سانپ بھی موجود ہے، تاہم اب تک یہ واضح نہ ہوسکا کہ سانپ کا زہریلا بچہ شاپر بیگ میں داخل کیسے ہوا۔
خاتون نے سماجی رابطے کی ویب سائٹ فیس بک پر سانپ کی تصویر شیئر کی اور شہریوں کو منتبہ کیا کہ وہ بھی آئندہ اس طرح کی اشیا خریدتے ہوئے اچھی طرح جانچ پڑتال کرلیا کریں۔
ان کا مزید کہنا تھا کہ واقعے سے متعلق محکمہ وائلڈ لائف کو بتایا جس کے بعد عملے نے سانپ کو ریسکیو کیا۔