لندن: کرونا وائرس کے خطرے کے پیش نظر ہیتھرو ایئر پورٹ پر ایک ہوٹل بک کر لیا گیا ہے جس میں چین سے آنے والے مسافروں کو ٹھہرایا جائے گا۔
تفصیلات کے مطابق برطانیہ میں کرونا وائرس کی روک تھام کے سلسلے میں ہیتھرو ایئر پورٹ پر چین سے آنے والوں کے لیے ایک ہوٹل بک کر لیا گیا ہے جہاں ٹیسٹ ہونے اور نتائج آنے تک مسافر قیام کریں گے۔
مکمل تشخیص تک چین سے آنے والے مسافروں کو ہوٹل کے اندر ہی رکھا جائے گا، جب کہ وائرس کے شکار افراد کو این ایچ ایس کے حوالے کیا جائے گا۔
جاپان کے شہر ٹوکیو کے قریب یوکوہاما پورٹ پر کرونا وائرس سے متاثرہ بحری جہاز میں پھنسے ہوئے برطانوی آخر کار وطن لوٹنے لگے ہیں، رپورٹس کے مطابق بحری جہاز ڈائمنڈ پرنسز پر پھنسے برطانویوں کے اس الزام کے بعد کہ فارن آفس نے انھیں بے یار و مددگار چھوڑ دیا ہے، 70 برطانویوں کی واپسی کا عمل شروع کر دیا گیا ہے۔
اس جہاز پر سے امریکی شہری نکالے جا چکے ہیں، جب کہ جہاز پر آن بورڈ 3 ہزار مسافروں میں سے 454 میں کرونا وائرس کی تشخیص کی جا چکی ہے، ان میں 99 کیسز کی گزشتہ روز تصدیق کی گئی تھی، جس کے بعد برطانوی شہریوں میں غصہ بڑھ گیا تھا اور وہ حکومت پر شدید تنقید کر رہے تھے۔
خیال رہے کہ کرونا وائرس سے چین میں اموات کی تعداد 1800 سے بڑھ چکی ہے، گزشتہ روز ہوبائی صوبے میں 93 افراد کرونا وائرس کا شکار ہو کر ہلاک ہوئے۔
