اردو ادب لکھنے اور پڑھنے کے دلدادہ افراد کے لیے خوشخبری، مارکیٹ میں آگئی ہے ایک ایسی موبائل ایپ جو کہ قاموس کی سہولت فراہم کرے گی۔
اردوتھسارس ڈاٹ کام نامی ویب سائٹ نے اب لانچ کردی ہے اپنی موبائل ایپ جس سے کسی بھی لفظ کے ہم معنی الفاظ اور مترادفات اب آپ کی انگلیوں پر ہے۔
یہ ویب سائٹ اور موبائل ایپ کتاب نامی ایک پاکستانی سافٹ وئیر ڈیویلپر کمپنی اور پبلشنگ ہاؤس نے تیار کی ہے جس کا مقصد اردو کے قارئین کو جدید دور سے ہم آہنگ کرنا ہے۔
فی الحال ا س سروس کے لیے چالیس ہزار منفرد الفاظ اور بیس ہزار سے زائد ان کے ہم معنی الفاظ کا ذخیرہ مرتب کیا گیا ہے اور کمپنی کی جانب سے روز مرہ کی بنیاد پر ڈیٹا بیس اپڈیٹ کیا جارہا ہے۔
کمپنی کے ڈیویلپر جلد ہی ایک ڈکشنری بھی تیار کریں گے اور ساتھ ہی ساتھ سائنس ، آرٹس، قانون، تجارت، اور دیگرشعبہ ہائے زندگی سےتعلق رکھنے والی مخصوص لفظی تراکیب کو بھی موبائل ایپ کا حصہ بنائیں گے۔
کتاب نامی یہ کمپنی جلد ہی بچوں کے لیے بھی ایک ٹول لانچ کرنے کا ارادہ رکھتی ہے جس میں بچوں اورطالب علموں کے لیے ان کی مادری زبان کو بہتر طریقےسے بولنے ، لکھنے اور سمجھنے کے لیے بہت کچھ ہوگا۔
اس ایپ کی تیاری میں پانچ سال لگے ہیں اور ماہرین اردو ادب و لسانیات جناب ڈاکٹر تحسین فراقی، ڈاکٹر معین نظامی، محمد سلیم الرحمان، اور ڈاکٹر مظہر محمود شیرانی کی معاونت شامل ہے۔
