خلا میں تیرتی ہبل ٹیلی اسکوپ نے ایسے ستارے کی تصویر کھینچی ہے جو زمین سے لگ بھگ 13 ارب نوری سال کے فاصلے پر واقع ہے۔
بین الاقوامی ویب سائٹ کے مطابق گزشتہ تین دہائیوں سے کائنات کے متعلق ہماری معلومات میں اضافے اور خوبصورت ترین اجرام فلکی کا نظارہ کروانے کے بعد کائنات میں دور ترین ستارے کی ایک تصویر کھینچی گئی ہے۔
جان ہاپکنز یونیورسٹی کے ماہرِ فلکیات نے ہبل خلائی دوربین کی مدد سے ایک ایسے ستارے کا عکس لیا ہے جو 12 ارب 90 کروڑ نوری سال کے فاصلے پر واقع ہے۔
اسے ماہرین نے بعید ترین ستارہ قرار دیا ہے اور اسے WHL0137-LS کا تکنیکی نام دیا گیا ہے، تاہم اس کا سادہ نام ایرینڈل ہے جو قدیم انگریزی میں صبح کے ستارے یا ابھرتے ستارے کے لیے استعمال ہوتا ہے۔
ماہرین کے مطابق کائنات کی تشکیل کے ابتدائی ایک ارب برس تک یہ ستارہ روشنی بکھیر رہا تھا اور اس وقت کائنات نئی نئی بنی تھی اور اس کی عمر موجودہ کائنات کی عمر کے مقابلے میں صرف 7 فیصد تھی۔
سنہ 2018 میں ہبل خلائی دوربین نے ایک دور ترین ستارہ دریافت کیا تھا جو 9 ارب نوری سال کے فاصلے پر موجود تھا لیکن اب نئی دریافت نے سارے ریکارڈ توڑ دیے ہیں۔
