پاکستان کی معروف گلوکارہ حمیرا ارشد کے سابق شوہر احمد بٹ کے بھائی نے مبینہ طور پر ان کے ساتھ لاکھوں روپے کا فراڈ کر ڈالا ہے۔
حمیرا ارشد نے سابق دیور عقیل بٹ کی جانب سے 70 لاکھ روپے کا فراڈ کیے جانے کے خلاف لاہور کے تھانہ اقبال ٹاؤن میں مقدمہ درج کروا لیا ہے۔
گلوکارہ کے مطابق ان کے سابق شوہر احمد بٹ کے بھائی عقیل بٹ نے پلاٹ لینے کے لیے 70 لاکھ روپے لیے مگر کئی سال گزر جانے کے باوجود بھی پلاٹ لیا اور نہ ہی رقم واپس کی۔
حمیرا ارشد نے کہا: ’بلآخر میں نے تھانہ اقبال ٹاؤن میں عقیل بٹ کے خلاف ایف آئی آر درج کروا دی، اپنے بیٹے علی متقین کے بہتر مستقبل کے لیے یہ رقم دی تھی، پولیس سے رقم کی برآمدگی کی درخواست کرتی ہوں‘۔
خیال رہے کہ احمد بٹ نے 2019 میں حمیرا ارشد کو طلاق دی تھی۔ دونوں نے باہمی رضامندی سے علیحدگی کا فیصلہ تھا۔ گلوکارہ کا بیٹا سابق شوہر کے ساتھ رہتا ہے۔
دونوں تقریباً 14 سال تک شادی کے بندھن میں بندھے رہے، اس دوران ان کی ازدواجی زندگی میں کئی بار اتار چڑھاؤ آیا اور پھر رشتہ ٹوٹ گیا۔
