امریکا میں ایک قبرستان میں قبر سے باہر نکلے انسانی بالوں نے سب کو خوفزدہ کردیا، مذکورہ قبر ایک صدی پرانی ہے جو اب ٹوٹ پھوٹ کا شکار ہے۔
امریکی ریاست کیلی فورنیا میں واقع سینٹ جوزف کیتھولک قبرستان میں آنے والا شخص اس وقت خوفزدہ ہوگیا جب اس نے ایک قبر کے قریب انسانی بال دیکھے۔
قبر پر لگے کتبے کے مطابق قبر ایک صدی قدیم ہے جہاں آنے والے 37 سالہ شخص نے اس منظر کی ویڈیو بنا کر ٹک ٹاک پر اپ لوڈ کی۔
ویڈیو میں دیکھا جاسکتا ہے قبر کی مضبوط کنکریٹ میں ایک دراڑ ہے جہاں سے انسانی بال باہر آتے دکھائی دے رہے ہیں۔
ٹک ٹاک پر ایک صارف نے ویڈیو پر کمنٹ کیا کہ بارش اور سیلاب کے بعد اکثر قبرستانوں میں اس قسم کے واقعات رونما ہوتے ہیں۔
37 سالہ شخص کا کہنا تھا کہ اس نے مزید قبروں کو بھی بغور دیکھا اور ان قبروں پر بھی گلہریوں اور دیگر جانوروں کی وجہ سے دراڑیں پڑ رہی تھیں جبکہ تیزی سے بڑھتے ہوئے درخت بھی قبروں کو نقصان پہنچا رہے تھے۔
مذکورہ شخص کا کہنا تھا کہ بظاہر یوں لگ رہا ہے کہ قریب موجود درخت کی جڑیں قبر کے اندر تک بڑھ گئیں جس کے باعث اندر موجود انسانی باقیات باہر آگئیں۔ اس کا کہنا ہے کہ وہ جلد ہی ان بالوں کا ایک نمونہ ٹیسٹ کروائے گا تاکہ تصدیق ہوسکے کہ یہ انسانی بال ہیں یا کسی اور جاندار کے بال ہیں۔
