The news is by your side.

Advertisement

دی ہنڈریڈ سیریز انگلینڈ:‌ بابراعظم ڈرافٹ کے مہنگے ترین کھلاڑی قرار

پاکستان کرکٹ ٹیم کے کپتان بابر اعظم شاندار کارکردگی کے باعث انگلینڈ کی دی ہنڈریڈ سیریز ڈرافٹ کے مہنگے ترین کھلاڑیوں میں شامل ہوگئے۔

اے آر وائی نیوز کی رپورٹ کے مطابق مایہ ناز بلے باز اور پاکستان کے آل فارمیٹ کے کپتان بابر اعظم کو مسلسل ٹاپ رینکنگ میں رہنے اور شاندار کارکردگی پیش کرنے کے باعث ٹورنامنٹ کی اوورسیز انٹرینٹ کیٹیگری میں سب سے زیادہ 1 لاکھ 25 ہزار پاؤنڈز پر رجسٹرڈ کیا گیا ہے۔

سب سے مہنگے دیگر اوورسیز کھلاڑیوں میں بابراعظم کے علاوہ کرس گیل، مچل مارش سنیل نارائن، کیرون پولارڈ، نکولس پوران، تبریز شمسی، اور ڈیوڈ وارنر شامل ہیں۔

دوسری جانب پاکستان کے بائیں ہاتھ کے تیز گیند باز محمد عامر، لیگ اسپنر شاداب خان، اور دائیں ہاتھ کے پیسر حارث رؤف کو 75,000 پاؤنڈ کی بنیادی قیمت کے ساتھ مدوسری کیٹیگری میں رجسٹر کیا گیا ہے۔

نمائندہ اے آر وائی کی رپورٹ کے مطابق آل راؤنڈر شعیب ملک اور نوجوان تیز گیند باز نسیم شاہ کی قیمت 50,000 پاؤنڈز رکھی گئی ہے۔

عماد وسیم، وہاب ریاض اور شان مسعود نے خود کو £40,000 کی کیٹیگری میں رکھا ہے جب کہ سابق کپتان سرفراز احمد، محمد حفیظ، شاہنواز دہانی، کامران اکمل، اعظم خان، صہیب مقصود اور محمد نواز بغیر کسی مخصوص قیمت کے کھلاڑیوں کی فہرست میں شامل ہیں۔

رپورٹ میں کہا گیا ہے کہ 4 اپریل کو شیڈول ہنڈریڈ کے آئندہ ڈرافٹ کے لیے کل 44 پاکستانی کھلاڑیوں نے سائن اپ کیا ہے۔

واضح رہے کہ اس سال کا دی ہنڈریڈ 3 اگست کو شروع ہوگا، مختلف فرنچائزز میں بین الاقوامی کھلاڑیوں کے لیے 17 سلاٹس دستیاب ہیں۔

Comments

یہ بھی پڑھیں