کراچی: سندھ بھر کی نرسز کا 24 روزہ احتجاجی دھرنا رنگ لے آیا، سیکڑوں نرسز کو اگلے گریڈ میں ترقی دینے کا فیصلہ کر لیا گیا ہے۔
تفصیلات کے مطابق حکومت سندھ اور محکمہ فنانس نے نرسز کے فور ٹیئر فارمولے کو بجٹ میں شامل کر لیا ہے، جس کے تحت سندھ کی نرسوں کو اگلے گریڈ میں ترقی دی جائے گی۔
حکومت سندھ کی جانب سے حالیہ اقدام پر ینگ نرسز ایسوسی ایشن نے وزیر اعلیٰ سندھ مراد علی شاہ اور وزیر صحت کا شکریہ ادا کیا۔
رپورٹ کے مطابق پہلے فیز میں 1047 نرسز کو اگلے گریڈ میں ترقی دی جائے گی، اگلے گریڈ میں ترقی پانے والوں میں گریڈ 16 سے 20 تک کے افسران شامل ہیں۔ ڈائریکٹر نرسنگ اور کالج آف نرسنگ کے پرنسپل کا گریڈ بھی 20 ہوگا۔
سندھ میں پہلے 19 گریڈ کی 7 سیٹیں تھیں، مزید 14 سیٹوں کا بھی اضافہ کر دیا گیا ہے۔ حکومتی اقدام پر سندھ نرسز الاؤنس نے بھی سندھ حکومت اور محکمہ صحت کا شکریہ ادا کیا۔
یہ بھی پڑھیں: وفاقی اسپتالوں میں ریگولر نرسز کے الاونسز میں اضافہ
واضح رہے کہ نرسز کا مطالبہ تھا کہ ان کی تنخواہیں بھی دیگر صوبوں کے برابر کی جائیں اور سروس اسٹرکچر بحال کیا جائے، نرسز نے مطالبات کے لیے کراچی پریس کلب کے باہر طویل دھرنا دیا، جس پر سندھ حکومت کی جانب سے نوٹیفکیشن بھی جاری کرنا پڑا۔
نرسز کے سندھ کے مشیر اطلاعات مرتضیٰ وہاب کے ساتھ مذاکرات بھی ہوئے، اس سے قبل نرسز نے وزیر اعلیٰ ہاؤس جانے کی کوشش کی تو پولیس کی جانب سے ان پر آنسو گیس اور واٹر کینن کا استعمال بھی کیا گیا۔
