The news is by your side.

Advertisement

کراچی: ہوا کا کم دباؤ ڈپریشن اور سمندری طوفان میں تبدیل ہونے کا امکان ہے، موسمیات کا نیا الرٹ جاری

کراچی: محکمہ موسمیات نے نیا الرٹ جاری کرتے ہوئے کہا ہے کہ ہوا کا کم دباؤ ڈپریشن اور سمندری طوفان میں تبدیل ہونے کا امکان ہے۔

تفصیلات کے مطابق محکمہ موسمیات نے ممکنہ سمندری طوفان سے متعلق نیا الرٹ جاری کرتے ہوئے کہا ہے کہ اس وقت ہوا کا کم دباؤ بھارتی شہر گجرات کے جنوب میں موجود ہے، اور یہ کل تک بحیرۂ عرب پہنچ جائے گا۔

موسمیات نے کہا ہے کہ بحیرۂ عرب پہنچنے پر امکان ہے کہ ہوا کا کم دباؤ شدت اختیار کرتے ہوئے ڈپریشن میں تبدیل ہوجائے، سازگار ماحولیاتی صورت حال کی وجہ سے امکان ہے کہ یہ ڈپریشن شدت اختیار کرتے ہوئے سمندری طوفان میں تبدیل ہو جائے۔

محکمہ موسمیات کے مطابق اس سسٹم کے نتیجے میں 30 ستمبر سے 2 اکتوبر تک کراچی، حیدر آباد، ٹھٹھہ اور دیگر اضلاع میں شدید اور موسلا دھار بارش کا امکان ہے، جب کہ کراچی، حیدر آباد، ٹھٹھہ اور دادو میں اربن فلڈنگ کے بھی خدشات ہیں۔

بارش برسانے والا طاقتور سسٹم داخل ، کراچی ڈوبنے کا خدشہ

موسمیات نے خبردار کیا ہے کہ سمندری طغیانی کے باعث ماہی گیر 30 ستمبر سے 3 اکتوبر تک کھلے سمندر میں جانے سے اجتناب برتیں، اور تمام متعلقہ ادارے اس حوالے سے ہائی الرٹ رہیں۔

پی ڈی ایم اے الرٹ

ڈیزاسٹر منیجمنٹ اتھارٹی نے بھی بارشوں کی تباہ کاریوں سے بچنے اور حفاظتی اقدامات کرنے کے لیے متعلقہ اداروں کو الرٹ جاری کر دیا ہے۔

پی ڈی ایم اے مراسلے میں کہا ہے کہ متعلقہ ادارے اپنے وسائل تیار رکھیں اور سڑکوں پر مشینری اور عملے کے ساتھ موجود رہیں، جن علاقوں میں اربن فلڈنگ کا خطرہ ہے، وہاں پیشگی انتظامات کیے جائیں، اور انسانی جان اور املاک کی حفاظت کے لیے تمام وسائل بروئے کار لائے جائیں۔

Comments

یہ بھی پڑھیں