فلوریڈا : سمندری طوفان ارما کے پیشِ نظر مسلمانوں نے فلوریڈا میں مساجد کےدروازے سب کیلئے کھول دیے اور عارضی شیلٹر ہوم قائم کردیے گئے ہیں۔
تفصیلات کے مطابق طاقتور طوفان ارما کے پیشِ نظر مسلمان کمیونٹی نے مساجد کے دروازے سب کیلئے کھول دیے اور عارضی شیلٹر ہوم قائم کردیے گئے ہیں۔ پاکستانی قونصل جنرل برائے فلوریڈاعائشہ فاروقی کا کہنا ہے کہ فلوریڈامیں ہنگامی صورتحال نافذ ہے، فلوریڈا سے بیس ہزار پاکستانی نژاد امریکی شہری نقل مکانی کرگئے ہیں۔
عائشہ فاروقی کا کہنا ہے کہ پاکستانی کمیونٹی ایک دوسرے کی مدد کررہی ہے، فلوریڈامیں 60سے70ہزارپاکستانی موجود ہیں۔
ڈائریکٹر اکنا ریلیف عبدالرؤف نے کہا کے طوفان کے پیش نظر سترہزار سے زائد متاثرین کیلئے شیلٹرہوم قائم کردئیے ہیں اور مسلم متاثرین کیلئےحلال کھانے کے انتظام موجود ہیں، ہراسلامی سینٹر میں ادویات اور خوراک کی سہولت موجود ہے، اسلامی سینٹر کے شیلٹرز میں ہر مذہب اور نسل کے لوگ موجود ہیں۔
مزید پڑھیں : سمندری طوفان ارما فلوریڈا سے ٹکرا گیا، 4 افراد ہلاک
دوسری جانب امریکی ریاست فلوریڈا میں سمندری طوفان ارما کی تباہ کاریوں کا سلسلہ جاری ہے، مختلف حادثات میں چار افراد ہلاک اور ہزاروں بے گھر ہوگئے جبکہ تیس لاکھ سے زیادہ افراد بجلی سے محروم ہیں۔
امریکی صدر نے فلوریڈا کو آفت زدہ قرار دے دیا ہے۔
طوفان کی وجہ سے لہریں5سے10فٹ تک بلند ہیں جس کے باعث سیلاب کا خدشہ پیدا ہو گیا ہے جبکہ ارما طوفان کی وجہ سے ٹامپا شہر میں کرفیو لگا دیا گیا ہے۔
فلوریڈا کے گورنر رک اسکاٹ کا کہنا ہے کہ انہیں ریاست کی مغربی خلیجی ساحل کے حوالے سے تشویش لاحق ہے جو اس طوفان کا اگلا نشانہ ہوگی۔
