The news is by your side.

Advertisement

خاتون کا نیند میں اپنے جرم کا اعتراف، شوہر پولیس کے پاس پہنچ گیا

امریکا میں ایک خاتون بھاری رقم چرانے کے بعد اسے راز نہ رکھ سکیں اور سوتے میں اپنے جرم کا اعتراف کرلیا، جس کے بعد شوہر نے پولیس کو اطلاع کردی۔

امریکا کی رہائشی رتھ فورٹ ایک کیئر ہوم میں ملازمت کرتی تھیں جہاں انہیں وہیل چیئر کی محتاج ایک بیمار خاتون کی دیکھ بھال پر معمور کیا گیا۔

دوران گفتگو مریضہ نے اپنے اکاؤنٹ میں موجود بھاری رقم کا تذکرہ کیا جس کے بعد رتھ نے ان کا ڈیبٹ کارڈ چرا لیا اور کسی طرح اس کا پن بھی حاصل کرلیا۔ رتھ نے ان کے اکاؤنٹ سے 7 ہزار 200 پاؤنڈز (17 لاکھ پاکستانی روپے سے زائد) کی رقم نکلوائی۔

اس رقم سے رتھ نے اپنے شوہر اور 3 بچوں کے ساتھ میکسیکو میں تعطیلات گزاریں جبکہ فراغ دلی سے خریداری بھی کی۔

بعد ازاں ایک رات نیند میں گفتگو کے دوران انہوں نے اپنی چوری کا اعتراف کرلیا۔

رتھ کے شوہر نے ان کی اعترافی گفتگو سنی تو پولیس کو اطلاع دینے میں تاخیر نہیں کی۔ 61 سالہ شوہر کا کہنا تھا کہ انہیں یہ جان کر بہت دکھ ہوا کہ ان کی اہلیہ نے ایک بیمار خاتون کو دھوکا دیا۔

شوہر کا کہنا تھا کہ وہ میکسیکو میں تعطیلات منانے کے بعد سے مشکوک تھے کیونکہ وہ اور ان کی اہلیہ کبھی بھی اتنی پرتعیش تعطیلات کے متحمل نہیں ہوسکتے تھے۔

انہوں نے کہا کہ وہ اپنی اہلیہ سے محبت کرتے ہیں لیکن اس نے جرم کیا تھا اور وہ اسے نظر انداز نہیں کرسکتے تھے۔

جرم ثابت ہوجانے کے بعد مذکورہ خاتون کو مقامی عدالت کی جانب سے 16 ماہ کی سزا سنائی گئی۔

Comments

یہ بھی پڑھیں