نئی دہلی: بھارت میں ایک خاتون کا کہنا ہے کہ ان کے شوہر نے ان کی لاعلمی میں ان کا گردہ نکلوا کر بلیک مارکیٹ میں فروخت کردیا ہے۔
بھارتی میڈیا کے مطابق ایک خاتون نے اپنے شوہر پر الزام عائد کیا ہے کہ اس نے بغیر ان کی مرضی اور اجازت کے اس کا ایک گردہ چوری کروا کر بلیک مارکیٹ میں فروخت کردیا۔
مشرقی بھارتی ریاست اوڑیسہ کے ایک گاؤں کوڈومیٹا کی ایک درمیانی عمر کی خاتون رنجیتا کونڈو نے دعویٰ کیا کہ اس کے شوہر نے 4 برس قبل ان کا ایک گردہ چرا کر فروخت کردیا۔
ان کے مطابق انہیں حال ہی میں اس وقت اس کا پتہ چلا جب وہ پیٹ کی تکلیف کے باعث ڈاکٹر کے پاس گئیں جہاں انہیں بتایا گیا کہ ان کے جسم میں صرف ایک گردہ کام کررہا ہے۔
خاتون نے بتایا کہ سنہ 2018 میں ان کے گردے میں پتھری ہوگئی تھی جس پر ان کا شوہر یہ بتا کر اسپتال لے گیا کہ ان کے گردے میں موجود پتھری (کڈنی اسٹون) نکلوانا ہے، وہاں اس نے ان کا ایک گردہ نکلوانے کا انتظام کر رکھا تھا، تاکہ وہ اسے بلیک مارکیٹ میں فروخت کرسکے۔
خاتون کے مطابق انہیں یہ اس لیے پتہ نہیں چلا کہ اسے اینستھیسیا دیا گیا تھا، ان کے مطابق شوہر پراسنت کونڈو بنگلہ دیشی شہری ہے اور وہ غیر قانونی امیگرنٹ کے طور پر رہائش پذیر تھا۔
خاتون کا کہنا ہے کہ ان کی شادی 12 سال قبل ہوئی اور ان کے 2 بچے ہیں، 2 ماہ قبل ان کا شوہر کسی اور عورت کے ساتھ فرار ہوگیا تھا جس کے بعد خاتون کو مکان سے نکال دیا گیا اور اب وہ اپنے والدین کے پاس منتقل ہوگئی ہیں۔
