نئی دہلی: بھارت میں شوہر کے ہاتھوں جبر اور اجیرن کی زندگی گزارنے والی بیوی کو پولیس نے بازیاب کرالیا، شہری نے متاثرہ خاتون کو ڈیڑھ سال سے ٹوائلٹ میں بند کر رکھا تھا۔
غیرملکی خبررساں ادارے کی رپورٹ کے مطابق بھارتی ریاست ہریانہ کے شہر پانی پت میں شوہر اپنی 35 سالہ بیوی کو ذہنی مریضہ قرار دے کر ٹوائلٹ میں بند رکھتا تھا، مسلسل 18 ماہ سے بند رہنے کے باعث خاتون چلنے کے قابل نہیں رہیں، تحقیقات کے دوران پتا چلا کہ عورت ذہنی مریضہ نہیں ہیں۔
رپورٹ کے مطابق پولیس کے ہاتھوں ریسکیو کے دوران یہ بھی پتا چلا کہ خاتون کئی دنوں سے بھوکی تھیں اور تین فٹ کے ٹوئلٹ میں گھٹن کی زندگی گزار رہی تھیں۔
پولیس نے کارروائی کرتے ہوئے نریش کمار نامی شوہر کو گرفتار کرلیا۔ متعلقہ ادارے کا کہنا ہے کہ خاتون کی شادی 17 سال قبل ہوئی اور ان کے تین بچے بھی ہیں جن کی عمریں 11 سے 15 سال کے درمیان ہیں۔
ابتدائی تفتیش کے دوارن شوہر نے بیوی کو ذہنی بیمار قرار دینے کا جھوٹا دعویٰ کیا لیکن بیماری سے متعلق تحریری دستاوزات مانگی گئیں تو اس نے نہیں دیں، میڈیکل چیک سے ثابت ہوا کہ خاتون ذہنی مریضہ نہیں ہیں۔
