The news is by your side.

Advertisement

ق لیگ میں دراڑ پڑ گئی؛ چوہدری وجاہت کے بیٹے نے پارٹی چھوڑ دی

مسلم لیگ (ق) کی قیادت میں دراڑ پڑنے کے بعد چوہدری وجاہت کے بیٹے حسین الٰہی نے پارٹی چھوڑنے کا اعلان کر دیا ہے۔

حسین الٰہی نے اس کی تصدیق کرتے ہوئے ٹوئٹر پر جاری اپنے بیان میں کہا کہ ہمیشہ یہ ہی کہا ہے کہ میرے لیے میرا ملک سب سے پہلے ہے، ق لیگ کے ساتھ اپنا سیاسی سفر ختم کر رہا ہوں۔

انہوں نے کہا کہ مستقبل کی سیاست کا فیصلہ مونس الٰہی کے ساتھ کروں گا، اس جماعت میں نہیں رہ سکتا جو شہباز شریف کو سپورٹ کرتی ہو۔

خیال رہے کہ مسلم لیگ (ق) کی قیادت میں دراڑ کی خبر سب سے پہلے اے آر وائی نیوز نے بریک کی تھی جس کی اب تصدیق ہوگئی ہے۔

اے آر وائی نیوز کے بیورو چیف خاور گھمن کی رپورٹ کے مطابق موجودہ پاکستانی کی سیاسی فضا میں بڑی ہلچل رونما ہوئی اور ملکی سیاست میں ہمیشہ اہم کردار ادا کرنے والے چوہدری برادران کے درمیان اختلافات شدت اختیار کر گئے جس کے بعد ق لیگ کے سربراہ چوہدری شجاعت حسین اور پرویز الہٰی نے اپنی راہیں جدا کرنے کا فیصلہ کیا۔

اس حوالے سے ذرائع نے اے آر وائی نیوز کو بتایا کہ پرویز الٰہی عمران خان کے حامی جب کہ چوہدری شجاعت ن لیگ کے ساتھ رہنا چاہتے ہیں اور اپنے بچوں کو ن لیگ میں دیکھنا چاہتے ہیں۔

کچھ ایسا ہی خیال ق لیگ کے دونوں بڑوں کے بچوں کا بھی ہے پرویز الہٰی کے صاحبزادے مونس الٰہی اپنا سیاسی مستقبل پاکستان تحریک انصاف کے ساتھ دیکھ رہے ہیں اور چوہدری وجاہت کےبیٹے حسین الٰہی، مونس الٰہی کیساتھ سیاسی مستقبل دیکھ رہے ہیں۔

یہ دونوں‌ قومی اسمبلی کے اراکین ہیں، جب کہ چوہدری شجاعت حسین کے صاحبزادے اور موجودہ حکومت میں وزیر مملکت چوہدری سالک حسین ن لیگ کے ساتھ جڑے رہنا چاہتے ہیں۔

Comments

یہ بھی پڑھیں