نئی دہلی: بھارت کے شہر حیدرآباد میں بینک مینیجر نے پڑوسی کے کتے کو تنگ آکر گولی مار دی، جسے پولیس نے گرفتار کرلیا۔
بھارتی میڈیا رپورٹ کے مطابق حیدرا آباد کے علاقے سرور نگر میں واقع باپو نگر میں نجی بینک کے مینیجر نے اتوار کے روز تنگ آکر پڑوسی کے پالتو کتے کو گولی ماردی۔
پولیس حکام کے مطابق بینک مینیجر کو پڑوسی کی شکایت پر گرفتار کرلیا گیا جس کی شناخت اویناش خان کے نام سے ہوئی۔
اویناش نے دوران حراست پولیس کو بتایا کہ پڑوسیوں کا کتا انہیں تنگ کرتا تھا اور اکثر گھر میں داخل ہوجاتا تھا، متعدد بار شکایت کے باوجود مالک نے اُسے نہ روکا جس پر انہیں غصہ آیا۔
بینک مینیجر نے پولیس کو بتایا کہ اتوار کی صبح میں گھر پر موجود تھا تو پڑوسی کا کتا گھر میں داخل ہوا جس پر مجھے غصہ آیا اور پھر میں نے اپنی ایئرگن نکال کر اُس پر فائر کردیے۔گولی لگتے ہی کتا وہی پر ہی مر گیا تھا۔
پولیس حکام کے مطابق انہیں کتے کے مالک راجو نے شکایت درج کرائی جس پر اویناش کو حراست میں لیا گیا۔ بینک مینیجر نے یہ بھی بتایا کہ اُس نے چند ماہ قبل 18 ہزار روپے کی گن خریدی تھی ۔