The news is by your side.

Advertisement

حیدر آباد میں پانی و بجلی کی عدم فراہمی کیخلاف ایم کیو ایم کا دھرنا

حیدرآباد : بجلی اور پانی کے بدترین بحران کے خلاف ایم کیو ایم نے حیدر آباد میں احتجاجی دھرنا دیا.

تفصیلات کے مطابق متحدہ قومی موومنٹ کے زیر اہتمام حیدرآباد میں پانی کی قلت اوربجلی کی غیراعلانیہ لوڈ شیڈنگ کیخلاف احتجاجی دھرنا دیا گیا.

حیدرآباد کے علاقے لطیف آباد کے خدا حافظ چوک پر دئیے گئے احتجاجی دھرنے میں مختلف علاقوں کے سینکڑوں مرد وخواتین نے شرکت کی، جنہوں نے ہاتھوں میں خالی مٹکے،بجلی کے بل اور برتن اٹھائے ہوئے تھے اور وہ واپڈا اور واسا کے خلاف نعرے لگارہے تھے۔

اس موقع پر خواتین نے احتجاجاً مٹکے توڑدئیے، مظاہرے میں شریک اسکول کے طلباء وطالبات علامتی طور پر سڑک پر بیٹھ کر ہوم ورک کررہے تھے۔

دھرنے کے شرکاء سے اراکین سندھ اسمبلی صابر قائم خانی اور دلاور قریشی نے خطاب کرتے ہوئے کہا کہ حیدرآباد میں بجلی اور پانی کا بدترین بحران ہے۔

بجلی کی طویل بندش نے لوگوں کی زندگی کو اجیرن بنادیا ہے جبکہ شہر کے کئی علاقوں میں گزشتہ کئی روز سے پانی کی عدم فراہمی کے باعث شدید گرمی میں لوگ بلبلااٹھے ہیں، لیکن متعلقہ حکام کوئی نوٹس نہیں لے رہے۔

انہوں نے اعلیٰ حکام سے مطالبہ کیا کہ شہر میں بدترین پانی اور بجلی کے بحران کا نوٹس لیا جائے اور منتخب بلدیاتی نمائندوں کو اختیارات دئیے جائیں تاکہ عوام کے بنیادی مسائل کو حل کیا جاسکے۔

 

Comments

comments

یہ بھی پڑھیں