حیدرآباد: صوبہ سندھ کے دوسرے بڑے شہر حیدر آباد میں مسلح افراد گھر سے کروڑوں روپے مالیت کا قیمتی سامان لوٹ کر فرار ہوگئے ہیں۔
تفصیلات کے مطابق ڈکیتی کی یہ واردات حسین آباد میں رونما ہوئی، جہاں چھ مسلح افراد اسلحے کے زور پر ایک گھر میں داخل ہوئے، گارڈ اور اہل خانہ کو یرغمال بناتے ہوئے لوٹ مار کی، مسلح افراد گھر سے 120 تولہ سونا ،پرائز بانڈز، ڈالرز اور نقدی لوٹ کر فرار ہوگئے۔
حسین آباد پولیس کے مطابق مسلح افراد لوٹ مار کے بعد فرار ہوگئے، واقعے کے بعد پولیس نے جائے واردات کا معائنہ کیا اور شواہد جمع کئے، ملزمان کی تلاش کے لئے علاقے سے سی سی ٹی وی فوٹیج تلاش کی جارہی ہے۔
تین کروڑ سے زائد کی ڈکیتی واردات کے بعد ایس ایس پی عبدالسلام نے بھی جائے واردات کا دورہ کیا اور متاثرہ فیملی سے ملاقات کی، ایس ایس پی کا کہنا تھا کہ مالکان تین کروڑ روپے سے زائد کا سامان بتا رہے ہیں، واقعے کی تحقیقات کررہے ہیں بنگلےکے ملازمین سے تفتیش جاری ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں