حیدرآباد: صوبہ سندھ کے شہر حیدرآباد میں پیش آنے والے ٹرین حادثے کی ابتدائی رپورٹ میں خدشہ ظاہر کیا گیا ہے کہ حادثہ جناح ایکسپریس کے ڈرائیور، اسسٹنٹ کی غفلت سے پیش آیا۔
تفصیلات کے مطابق حیدرآباد میں ٹرین حادثے کی ابتدائی رپورٹ میں بتایا گیا ہے کہ 20 جون کی شام ساڑھے5 بجے جناح ایکسپریس ساہیوال کول اسپیشل ٹرین سے ٹکرائی۔
ابتدائی رپورٹ کے مطابق حادثےمیں جناح ایکسپریس کاانجن تباہ ہوگیا، ٹرین ڈرائیوراور2 اسسٹنٹ ڈرائیورجاں بحق ہوئے۔ ڈرائیوراسلم چانڈیو،اسسٹنٹ یاسربشیر،عمان شاہ تھے۔ حادثےمیں کوئلے کی ٹرین کا گارڈ عمران شاہ بھی زخمی ہوا جو اسپتال میں زیرعلاج ہے۔
حادثے میں مال گاڑی کی پاور وین اورایک بوگی کونقصان پہنچا، زخمی گارڈکانام عمران شاہ ہےجواسپتال میں زیرعلاج ہے۔
ابتدائی رپورٹ میں بتایا گیا ہے کہ حادثے میں کسی مسافرکے جاں بحق یا زخمی ہونے کی اطلاع نہیں ہے. رپورٹ میں خدشہ ہے حادثہ جناح ایکسپریس کے ڈرائیور، اسسٹنٹ کی غفلت سے پیش آیا۔
کراچی سے جانے والی جناح ایکسپریس مال گاڑی سے ٹکرا گئی، 3 افراد جاں بحق
یاد رہے کہ گزشتہ روز حیدرآباد کے قریب کراچی سے جانے والی جناح ایکسپریس مال گاڑی سے ٹکرا گئی تھی، حادثے میں تین افراد جاں بحق اور متعدد زخمی ہوگئے تھے۔
وفاقی وزیر ریلوے شیخ رشید احمد نے حیدرآباد ٹرین حادثے کا نوٹس لیتے ہوئے حادثے کی متعلقہ افسران سے رپورٹ طلب کی تھی۔
