پشاور : وزیر خیبر پختونخوا محمود خان نے کرونا بحران سے متعلق گفتگو کرتے ہوئے کہا کہ عوام کے تعاون کے بغیر حکومت کرونا سے مقابلہ نہیں کرسکتی، رمضان قریب ہے ذخیرہ اندوزی کرنے والوں کو نہیں چھوڑیں گے۔
تفصیلات کے مطابق وزیر اعلیٰ خیبر پختونخوا نے کرونا وائرس بحران کے حوالے میڈیا سے گفتگو کرتے ہوئے کہا ہے کہ وزیر اعظم عمران خان کو احساس ایمرجنسی پروگرام پر خراج تحسین پیش کرتا ہوں، 144 ارب روپے ایک کروڑ 20 لاکھ خاندانوں میں تقسیم ہورہا ہے۔
ان کا کہنا تھا کہ ایران سے آنے والے لوگوں کو بہتر سہولتیں دیں اور وہ گھروں کو جاچکے ہیں جبکہ تبلیغی جماعت کے افراد کو بھی تمام سہولتیں فراہم کررہے ہیں۔
محمود خان نے کہا کہ احساس ایمرجنسی پروگرام سے کے پی کے 22 لاکھ خاندان مستفید ہوں گے، مستحق، غریب لوگوں کی مدد کیلئے وزیراعظم کے وژن پر عمل کررہے ہیں، میں نے اپنی جائیداد کا 2 ماہ کا کرایہ ختم کردیا ہے۔
وزیر اعلیٰ محمود خان نے کہا کہ رمضان قریب ہے ،ذخیرہ اندوزی کرنیوالوں کو نہیں چھوڑیں گے، ذخیرہ اندوزی اور ناجائز منافع خوری کرنیوالوں کو نشانہ عبرت بنائیں گے۔
انہوں نے بتایا کہ کورونا سے نمٹنے کیلئے کنٹرول روم فعال ہے کسی کو علامات ہوں تو وہ خود ہم سے رابطہ کرے۔ محمود خان نے بہتر خدمات فراہم کرنے پر ڈاکٹرز، پیرامیڈیکس عملے اور ریسکیو، پولیس، سیکیورٹی فورسز کو خراج تحسین پیش کرتا ہوں۔
وزیر اعلیٰ خیبر پختونخوا کا کہنا تھا کہ صوبے میں اب ایک ہزارٹیسٹ کی استعداد ہے لیکن میں ٹیسٹ کی تعداد 5 ہزار تک بڑھانا چاہتے ہیں، ہماری خواہش ہے اس وبا کا راستہ ہر حال میں روکیں، بس اللہ سے دعاگو ہوں کہ اس امتحان میں کامیابی عطا ہو۔
خیال رہے کہ خیبر پختون خوا میں کیسز کی تعداد 1,235 ہو گئی ہے، لیکن اموات دیگر صوبوں سے بڑھ کر 67 ہو گئیں، اب تک صرف 267 مریض ہی صحت یاب ہو سکے ہیں۔
