The news is by your side.

Advertisement

’میں عمران خان کے ساتھ کھڑا ہوں‘

قومی ٹیم کے سابق کپتان محمد حفیظ نے بھی وزیراعظم عمران خان کی حمایت میں بیان دے دیا۔

وزیراعظم کے خلاف تحریک اعتماد پیش ہونے کے بعد شوبز فنکاروں اور قومی ٹیم کے کھلاڑیوں کی جانب سے وزیراعظم کے حق میں بیانات دیے جارہے ہیں۔

قومی ٹیم کے سابق کپتان محمد حفیظ نے سماجی رابطے کی ویب سائٹ ٹویٹر پر اپنے پیغام میں لکھا کہ احترام کے ساتھ تمام سیاسی رہنماؤں پر واضح کرنا چاہتا ہوں کہ ہم ایک قابل فخر قوم ہیں اور اس پر کوئی سمجھوتہ نہیں کرسکتے۔

محمد حفیظ نے لکھا کہ میرے عمران خان کے ساتھ اختلافات ہیں لیکن ان کے پاکستان کی سالمیت کے موقف پر میں ان کے ساتھ کھڑا ہوں۔

اس سے قبل سابق کرکٹر وسیم اکرم نے بھی اپنے ٹویٹر پیغام میں کہا تھا کہ وزیراعظم عمران خان فائٹر ہیں، وہ اپنے لیے نہیں بلکہ جس کی نمائندگی کررہے ہیں اس کے لیے لڑںے، جیتنے اور قیادت کے لیے پیدا ہوئے ہیں۔

وسیم اکرم نے مزید لکھا کہ عمران خان اپنے نام، اقتدار یا پوزیشن کے لیے نہیں لڑر ہے بلکہ یہ ان کی تقدیر ہے، کھیل ابھی ختم نہیں ہوا ہے۔

قومی ٹیم کے سابق کوچ اور لیگ اسپنر مشتاق احمد نے ویڈیو پیغام شیئر کرتے ہوئے کہا کہ ’جب یہ ملک اللہ نے بنایا ہے تو وہ شاد بھی رہے گا اور آباد بھی رہے گا۔

مشتاق احمد نے کہا کہ کل ایک سیاست دان کا بیان سنا جو انہیں نہیں کرنی چاہیے تھی اس سے یقین کی کمی ہوجاتی ہے۔

انہوں نے کہا کہ ہماری سانسیں اللہ کے اختیار میں ہیں کسی کے اختیار میں نہیں ہیں، تمام پاکستانیوں کو پیغام ہے کہ حق کی بات سنیں، حق کی بات کریں اور اسی پر عمل کریں۔

Comments

یہ بھی پڑھیں