The news is by your side.

Advertisement

پاکستان ریلوے میں کرپٹ افسران اور ملازمین کو نہیں چھوڑوں گا، اعظم سواتی کا اعلان

لاہور : وزیرریلوے اعظم سواتی کا کہنا ہے کہ پاکستان ریلوے میں مفاد پرستوں کا ٹولہ موجود ہے، انہی چوروں کی وجہ سے ریلوے تباہ حال ہے، کرپٹ افسران اور ملازمین کو نہیں چھوڑوں گا۔

تفصیلات کے مطابق وزیرریلوےاعظم سواتی نے کیرج فیکٹری میں میڈیا سے گفتگو کرتے ہوئے کہا ہے کہ پاکستان ریلوےمیں اصلاحات کاعمل تیزی سےجاری ہے، ریلوے میں جدیدٹیکنالوجی متعارف کرارہے ہیں، موجودہ دور میں ترقی کیلئے جدید ٹیکنالوجی کا استعمال ناگزیر ہے۔

اعظم سواتی کا کہنا تھا کہ پاکستان ریلوے میں مفاد پرستوں کا ایک ٹولہ موجود ہے، ریلوے کے تمام افسران اور مزدور چور نہیں ہیں، بعض چور افسران، مزدوروں کی وجہ سے ریلوے تباہ حال ہے۔

وزیر ریلوے نے کہا کہ پاکستان ریلوے میں مافیاز موجود ہیں، مافیا کی مدد سے بعض ریلوے مزدور گھر بیٹھے تنخواہ لے رہے ہیں، ذاتی مفاد پرستوں کی وجہ سے ملکی ادارے تباہ ہو چکے ہیں۔

ان کا کہنا تھا کہ بدقسمتی سے ماضی میں قومی اداروں کو دانستہ تباہ کیا گیا، ماضی میں رشوت لیکر سو کی جگہ ہزار مزدور بھرتی کئے گئے، قومی وسائل ،عوام کے پیسے کو مال مفت سمجھ کر لٹایا گیا لیکن عمران خان اور اعظم سواتی بلیک میل نہیں ہوں گے۔

اعظم سواتی نے کہا کہ کام کرنے والے مزدور میرے سر کا تاج ہیں، کام کرنے والے مزدور کی تنخواہ بھی بڑھے گی شاباشی بھی ملے گی، حاضری کے جدیدنظام سے پتہ چلے گا کون کون کام پر آتا ہے، کام کرنیوالےریلوے افسر، مزدور کی تنخواہ ڈبل کروں گا۔

وفاقی وزیر کا مزید کہنا تھا کہ اسکریپ، ٹکٹ چوری میں ریلوے ملازمین ملوث ہیں، بغیر ٹیکنالوجی کے مافیا کو نہیں توڑ سکتے، حکومتی مراعات کا ایک روپیہ بھی لوں توگناہ گار ہوں، میڈیا مجھ پر اور میرے افسران پر نظر رکھے۔

انھوں نے مزید کہا کہ پاکستان ریلوے کو سب نے مل کر تباہ کیا ہے ، میری وزارت کے 7ماہ میں بہت سی اصلاحات کا آغاز کیا ، اولین ترجیح مال بردار ریل گاڑیوں کی حالت بہتر بنانا ہے۔

کرپٹ افراد کے حوالے سے اعظم سواتی کا کہنا تھا کہ پاکستان ریلوے کا کبھی نقصان نہیں ہونے دوں گا اور کرپٹ افراد ،قبضہ گروپوں کو نہیں چھوڑوں گا، پاکستان ریلوے میں کسی بدمعاش کو نہیں چھوڑوں گا، ہر ممکن کوشش ہے کیرج فیکٹری کو منافع بخش ادارہ بنا سکوں،میں کسی بھی صورت بلیک میل نہیں ہوں گا۔

Comments

یہ بھی پڑھیں