ابنِ ندیم، وَرّاق تھے۔ بغداد ان کا وطن تھا جہاں وہ ورّاقی یعنی کتابوں کی تدوین، تصحیح اور ان کی نقل میں مشغول رہتے۔ یہ کام ان کے لیے تحصیلِ علم اور ان کے ذوق مطالعہ کی تسکین کے ساتھ ساتھ یافت کا ذریعہ بھی تھا۔
ابنِ ندیم نے عربی کتب کا اشاریہ یا اِنڈیکس (index) تیّار کیا جو ان کا ایک شان دار کام ہے۔ اس میں کتابوں کا تعارف، مصنّفین کے مختصر حالاتِ زندگی اور مختلف علوم و فنون اور ان کی شاخوں کا تعارف بھی شامل ہے۔ عربی زبان میں ان کی یہ کتاب ’’الفہرست‘‘ کے نام سے مشہور ہے۔
ابنِ ندیم کے زمانے میں بغداد علم و فضل کا مرکز تھا۔ کتب خانے آباد اور دارُ المطالعہ بارونق ہوا کرتے تھے۔ اسی زمانے میں انھوں نے کئی عرب اور مسلمان مصنّفین، اہلِ علم اور قابلِ قدر ہستیوں کے مستند حالاتِ زندگی اور ان کے کارناموں کو کتابی شکل میں محفوظ کیا تھا، لیکن خود ان کے بارے میں بہت کم معلومات دست یاب ہیں۔
ان کا پورا نام محمد ابنِ اسحاق الندیم تھا۔ وہ ابنِ ندیم کے نام سے معروف ہوئے اور اپنے پیشے کی نسبت ورّاق کہلائے۔ سنِ پیدائش کے بارے میں وثوق سے کچھ نہیں کہا جاسکتا، لیکن تاریخ کے اوراق میں ان کی وفات کا سن 995 عیسوی درج ہے۔ ابنِ ندیم کی کتاب ’’الفہرست‘‘ ہے جو اس لحاظ سے نہایت اہم اور مستند بھی مانی جاتی ہے کہ اس میں ظہورِ اسلام کے بعد ابتدائی چار صدیوں کے دوران مسلمانوں نے عربی زبان میں جن علوم پر کتابیں تحریر کیں، ان کے مآخذ موضوع وار درج ہیں۔ یہ کتاب اُس دور کے علم و فنون اور تہذیبی و تمدّنی حالات کا احاطہ بھی کرتی ہے۔
’’الفہرست ‘‘میں جن موضوعات اور علوم و فنون پر کتابوں اور مصنّفین کا تذکرہ ہے ان میں کتابت اور رسمُ الخط، لغت اور نحو، شعرا اور شاعری، علمِ کلام اور متکلمین، فقہا اور محدثین، حساب و مہندسی اور موسیقی، طب، کیمیا اور دیگر شامل ہیں۔
ابنِ ندیم کو اسلامی دنیا میں کتب کی فہرست سازی اور اشاریہ سازی کی روایت کی بنیاد رکھنے والا کہا جاتا ہے۔ مطبوعات کی یہ فہرستیں اور اشاریے میدانِ تحقیق میں طالب علموں کے لیے بہت مفید اور کارآمد ثابت ہوتے ہیں۔
اس مشہور کتاب میں مصنّف نے شعبدہ بازوں اور جھاڑ پھونک کرنے والوں اور جنّات کا تذکرہ بھی کیا ہے اور شعبدہ گری یا جادو ٹونے کے لیے مشہور شخصیات کے نام اور ان کے کارنامے بھی بتائے ہیں۔
