The news is by your side.

کرکٹ میں تبدیلیاں یا مذاق؟ آئی سی سی کے اعلان نے سنسنی پھیلادی

دبئی: انٹرنیشنل کرکٹ کونسل نے ٹویٹر پر آج صبح کرکٹ میں تبدیلی کے حوالے سے باتیں کیں تو تبصروں کا ایک طوفان برپا ہوگیا، مگر پھر صارفین کو خیال آیا کہ آج تو یکم اپریل ہے۔

برطانوی خبررساں ادارے کے مطابق آئی سی سی نے اپریل فول بناتے ہوئے ٹویٹر پرلکھا کہ کرکٹ کے کھلاڑیوں کو انٹرنیشنل میچز کے دوران اب آپ نیکر میں کھیلتے ہوئے دیکھ سکتے ہیں، اب کرکٹ میں ٹاس نہیں ہوگا بلکہ ٹویٹر کے صارفین فیصلہ کریں گے کہ کون سی ٹیم پہلے بیٹنگ کرے گی۔

ان اعلانات کے ساتھ آئی سی سی نے ہیش ٹیگ ’کرکٹ ناٹ ایز یو نو‘ کا استعمال بھی کیا، جس کا مطلب ہے جیسی کرکٹ آپ جانتے ہیں ویسی نہیں۔

اپنے پہلے ٹویٹ میں آئی سی سی نے لکھا کہ وہ ٹیسٹ چیمپئن شپ سے قبل کچھ تبدیلیاں لارہا ہے جس میں نوجوان نسل کے لیے کرکٹ کو مزید دلچسپ بنانے پر توجہ مرکوز کی گئی ہے۔

آئی سی سی کے مطابق اب کھلاڑیوں کی جرسی پر نہ صرف نمبرز ہوں گے بلکہ ان کے انسٹاگرام ہینڈلز بھی ہوں گے۔

آئی سی سی نے اپنے دوسرے ٹویٹ میں لکھا کہ ورلڈ ٹیسٹ چیمپئن شپ سے قبل مزید تبدیلیوں میں سکے اچھالنے کی جگہ ٹویٹر پول ہوں گے جس میں کرکٹ کے مداحوں کو گھر بیٹھے یہ سہولت حاصل ہوگی کہ وہ اس میں شریک ہوکر یہ فیصلہ کریں کہ کون سی ٹیم بولنگ کرے گی اور کون سی بیٹنگ۔

اس کے علاوہ یہ بھی کہا گیا کہ ناظرین کو کرکٹ سے مزید قریب لانے کے لیے کمنٹیٹرز کو میدان میں سلپ کے پیچھے کھڑا کیا جاسکتا ہے۔

کچھ صارفین نے آئی سی سی کو مشورے دئیے تاہم ایک صارف نے لکھا کہ ’آئی سی سی آج ترنگ میں ہے، اپریل فول پر اپریل فول بنا رہی ہے۔‘

Comments

یہ بھی پڑھیں