نمیبیا (15 جنوری 2026): آئی سی سی انڈر 19 ورلڈ کپ کا آج سے آغاز ہو رہا ہے ایونٹ کی ٹرافی کا منفرد انداز میں نوعمر چیتوں کے فوٹو شوٹ کیا گیا ہے۔
آئی سی سی کے تحت کرکٹ کا کوئی میلہ ہو یا پھر باہمی سیریز، آغاز سے قبل کپتانوں کے ساتھ ٹرافی کے فوٹو شوٹ کی روایت رہی ہے۔ تاہم آج یہ روایت نمیبیا میں ایک نئے خوبصورت انداز سے ہوئی ہے۔
آئی سی سی ٹی 20 ورلڈ کپ 2026 کا میلہ آج سے زمبابوے اور نمیبیا میں سج رہا ہے، جس میں پاکستان سمیت 16 ٹیمیں شرکت کر رہی ہیں۔
ایونٹ کے آغاز سے قبل نمیبیا کے نیشنل پارک میں ورلڈ کپ کی ٹرافی کا نوعمر چیتوں کے ساتھ منفرد فوٹو شوٹ کیا گیا۔
یہ منفرد فوٹو شوٹ آئی سی سی کی آفیشل ایکس سائٹ پر بھی جاری کیا گیا ہے، جس میں چیتوں کو ٹرافی کے ساتھ پوز دیتے ہوئے دیکھا جا سکتا ہے۔
Curious cats and cricket fans are ready for #U19WorldCup action in Namibia
With thanks to @Naankuse Foundation pic.twitter.com/NpSj9o4Yfh
— ICC (@ICC) January 14, 2026
آئی سی سی ورلڈ کپ کے افتتاحی روز تین میچز کھیلیں جائیں گے اور تینوں میچز کا آغاز پاکستانی وقت کے مطابق دوپہر ساڑھے 12 بجے ہوگا۔
50 اوورز فارمیٹ پر مشتمل ٹورنامنٹ کا افتتاح کوئنز اسپورٹس کلب بولاوایو میں بھارت اور امریکا کے میچ سے ہوگا۔ دوسرا میچ میزبان ملک زمبابوے اور اسکاٹ لینڈ کے درمیان ہرارے میں جب کہ تیسرے میچ میں تنزانیہ اور ویسٹ انڈیز کی ٹیمیں مدمقابل ہوں گے۔
پاکستان ٹیم ایونٹ میں اپنا افتتاحی میچ کل انگلینڈ کے خلاف کھیلے گی۔
گروپ مرحلے میں مجموعی میچز 24 میچز 10 دن کے دوران کھیلے جائیں گے، زمبابوے میں میچز کوئنز اسپورٹس کلب، ہرارے اسپورٹس کلب اور تاکاشنگا اسپورٹس کلب میں ہوں گے۔
نمیبیا میں ونڈہوک کے نمیبیا کرکٹ گراؤنڈ اور ایچ پی اوول مقابلوں کی میزبانی کریں گے۔
گروپ مرحلے کے بعد سپر سکس مرحلہ بھی دونوں ممالک میں ہوگا تاہم سیمی فائنلز اور فائنل مکمل طور پر زمبابوے میں کھیلے جائیں گے۔
سیمی فائنلز 3 اور 4 فروری کو ہوں گے جبکہ فائنل 6 فروری کو ہرارے میں کھیلا جائے گا۔ آسٹریلیا اپنے اعزاز کے دفاع کے لیے ٹورنامنٹ میں اترے گا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں