کینیڈا: منجمد جھیل پر آئس بوٹ ریس کا آغاز ہفتے کے روز سے ہوگیا جس میں نوجوان کشتی رانوں نے یخ بستہ ہواؤں میں جوش وخروش سے مقابلے میں حصہ لیا جب کہ چین کے روایتی ڈریگن بوٹ نے ایونٹ میں چار چاند لگا دیے۔
تفصیلات کے مطابق کینیڈا کی یخ بستہ موسم سے لطف و اندوز ہونے کے لیے منجمد جھیل پر آئس بوٹ ریس کا انعقاد کیا گیا جس میں عالمی سطح کے نوجوان کھلاڑیوں کی بڑی تعداد نے شرکت کی اور اپنے کھیل سے شائقین کو محظوظ کیا۔
آئس بوٹ ریس کی رونق بڑھانے کو چینی ڈریگن بوٹس بھی کینیڈا پہنچ گئی ہے جہاں نوجوان جہاز ران مقابلے کے لیے بے تاب نظر آتے ہیں تو وہیں شائقین کی بڑی تعداد اپنی نوعیت کے اس انوکھے ایونٹ میں جوش و خروش سے شرکت کر رہے ہیں۔
شدید ترین سردی میں منجمد جھیل پرآئس بوٹ ریس میں چین کی روایت اور ثقافت کے تحت ڈریگن بوٹ کو دس سے زائد افراد کو بیٹھا کر چلائی گئی جب کہ نوجوان کشتی رانوں نے یخ بستہ ہواوٴں میں جوش وخروش سے مقابلے میں حصہ لیا۔
واضح رہے کہ ہر سال ہونے والے اس منفرد ایونٹ میں اس سال بھی دنیا بھر سے 60 ٹیمیں حصہ لے رہی ہیں جن کا ایک شاندار تقریب میں استقبال کیا گیا۔
