کراچی : چار روزہ دفاعی نمائش آئیڈیاز 2018 کا آغاز کل27نومبر بروز منگل سے ہورہا ہے جو تیس نومبر تک کراچی ایکسپو سینٹر میں جاری رہے گی، نمائش میں50سے زائد ممالک کے وفود شرکت کریں گے۔
تفصیلات کے مطابق بین الاقوامی دفاعی نمائش کی دسویں سالگرہ کی تیاریاں زور و شور سے جاری ہیں، کراچی ایکسپو سینٹر میں پاکستان میں تیار ہونے والے دفاعی سازو سامان کی دسویں بین الاقوامی نمائش آئیڈیاز دو ہزاراٹھارہ میں50سے زائد ممالک کے262سے زائد غیر ملکی وفود شرکت کر رہے ہیں۔
اس مرتبہ نمائش میں اسٹالز لگانے والوں کی تعداد ماضی کی آئیڈیاز سے زیادہ ہوگی، دفاعی نمائش میں522سے زائد کمپنیاں نمائش میں اپنی مصنوعات کو نمایاں کر یں گی، جن کا تعلق دنیا کے 52ملکوں سے ہے321غیر ملکی کمپنیاں اور201پاکستانی کمپنیاں شامل ہیں۔
آئیڈیاز دو ہزار اٹھارہ میں مزید ممالک شرکت کر رہے ہیں جن میں امریکہ، اٹلی، جرمنی، اردن، پولینڈ، روس، جنوبی کوریا،ی وکرائن، عرب امارات اور دیگر اہم ممالک شامل ہیں۔
اس حوالے سے ڈائریکٹر کوآرڈینیشن ڈیفنس ایکسپورٹ پروموشن آرگنائزیشن بریگیڈیئر وحید احمد نے کہا ہے کہ آئیڈیاز دو ہزار اٹھارہ نمائش میں روس کی نمائندگی کا اضافہ ہوا ہے، روس کے دو جنگی بحری جہاز بھی شرکت کریں گے۔
بریگیڈیئر وحید احمد کے مطابق پاکستان کی ڈیفنس کی برآمد مسلسل بڑھ رہی ہیں، برآمدات تیس کروڑ ڈالر سے بھی تجاوز کرچکی ہیں، عالمی سطح کی نمائش کا کراچی میں انعقاد شہریوں کیلئے بھی ایک اعزاز ہے۔
مزید پڑھیں: دفاعی نمائش آئیڈیاز، شہریوں کی سہولت کیلئے متبادل ٹریفک پلان کا اعلان
واضح رہے کہ ہر دو سال بعد منعقد ہونے والی اس نمائش کے انعقاد سے پاک فوج کے تینوں شعبہ جات کو اپنی عسکری قوت نمایاں کرنے کا موقع ملتا ہے۔ اس موقع پر ثقافتی پروگرام بھی منعقد کیے جاتے ہیں۔ حکومت اور نجی اداروں کے درمیان بھی کئی طرح کے معاہدے تشکیل دیئے جاتے ہیں۔
