کراچی: معروف اداکارہ و میزبان عفت عمر نے پاکستان شوبز انڈسٹری میں پائی جانے والی اقربا پروری پر آواز بلند کردی۔
تفصیلات کے مطابق بالی وڈ میں اقربا پروری کے خلاف آواز اٹھائی جارہی ہے اور ناصرف بھارتی فنکار اس کے خلاف بول رہے ہیں بلکہ پاکستانی فنکار بھی نامور شخصیات کو سشانت کی موت کی وجہ قرار دیتے نظر آرہے ہیں۔
اداکارہ و میزبان عفت عمر نے سماجی رابطے کی ویب سائٹ ٹویٹر پر اپنے پیغام میں پاکستان شوبز انڈسٹری میں پائی جانے والی اقربا پروری کے بارے میں بات کی۔
انہوں نے لکھا کہ پاکستانی انڈسٹری کے فنکار بھارتی فلم ساز کرن جوہر کے ٹی وی کافی ود کرن کی خبریں تو سوشل میڈیا پر شیئر کرتے ہیں اور ان کے خلاف بول بھی رہے ہیں لیکن آپ کی اپنی انڈسٹری میں ہونے والی اقربا پروری کے بارے میں کیا خیال ہے؟
Pakistani industry artists sharing news of coffee in Karan in hot water but darlings what about the #nepotism in your own backyard? Kabhi socha hay hamari industry me adakar kitne hayn?
— Iffat Omar Official (@OmarIffat) June 24, 2020
عفت عمر نے سوالیہ انداز میں پوچھا کہ ’آپ میں سے کسی نے بھی کبھی یہ سوچا ہے کہ ہماری انڈسٹری میں کتنے اداکار موجود ہیں۔
واضح رہے کہ رواں ماہ 14 جون کو بالی ووڈ نوجوان اداکار سشانت سنگھ راجپوت نے گلے میں پھندا لگا کر خودکشی کرلی تھی واقعے کے بعد سے بھارتی عوام کی جانب سے بالی ووڈ انڈسٹری اور دیگر نامور بھارتی فنکاروں کو سشانت کی خودکشی کی وجہ قرار دیا جارہا ہے جن میں کرن جوہر، سلمان خان، عالیہ بھٹ ودیگر شامل ہیں۔
