کراچی : شہر میں جرائم کی بڑھتی وارداتوں کے پیش نظر پولیس کی مدد کرنے والے شہری کو انعام دینے کا فیصلہ کرلیا گیا۔
تفصیلات کے مطابق آئی جی سندھ غلام نبی میمن کی جانب سے شہر میں جرائم کی بڑھتی وارداتوں کے پیش نظر اہم حکمنامہ جاری کردیا گیا ہے۔
جس میں کہا گیا ہے کہ جرائم پیشہ عناصر کے خلاف پولیس کی مدد کرنے والا شہری اب انعام کا حقدار ہوگا۔
جاری کردہ حکمنامہ میں کہا ہے کہ جرائم کے خلاف پولیس کی مدد کرنے والے شہریوں کی ستائش کی جائے ، قانون پسند اور پولیس سے تعاون کرنے والے شہریوں کو نقد انعام دیا جائے۔
آئی جی سندھ کا کہنا تھا کہ جرائم کے خلاف کمیونٹی پولیسنگ ایک کارآمد اور موثر ہتھیار ہے۔
غلام نبی میمن نے کہا کہ جرم کے خلاف پہلی اطلاع پولیس کو دینے والا ایک عام شہری ہوتا ہے ، اطلاع ، گواہی ، جرائم پیشہ افراد کے خلاف مقدمات کے پیروی کرنے والے شہریوں کی حوصلہ افزائی کی جائے۔
ان کا کہنا تھا کہ شہری بلا کسی خوف و خطر پولیس کو اطلاع دیں پولیس تحفظ فراہم کرے گی ، مددگار ون فائیو کو جلد سی سی ٹی وی کیمروں سے منسلک کردیا جائے گا۔
